«Samuryq-Qazynanyń» syrtqy qaryzy 4 trln teńgege jetken

ASTANA. KAZINFORM – «Samuryq-Qazyna» ál-aýqat qorynyń nomınaldy qaryzy 10 trln teńgege jetken. Bul týraly aktsıonerlik qoǵamnyń ekonomıka jáne qarjy jónindegi basqarýshy dırektory Aıdar Rysqulov baspasóz máslıhatynda málim etti.

«Bizdiń qaryzdyń nomınaldy somasy negizi 10 trln teńge. Biraq balanstyq somasy – 8 trln teńge. Onyń ishinde syrtqy borysh – 50 paıyz. Negizinen «QazMunaıGaz», «QazAtomÓnerkásip» sııaqty iri kompanııalarymyz ınfraqurylym jobalaryna syrttan qaryz aldy. Qytaıdan bar, 2 mlrd dollar. Ol «Qazaqstan polıpropılen» kompanııasyna alǵan. Joba engizilgen, qazir qalypty jumys istep tur», - dedi ol jýrnalıstiń suraǵyna bergen jaýabynda.

Qordyń Ekonomıka jáne josparlaý departamentiniń dırektory Mırat Ótepovtiń aıtýynsha, qordyń erejesi syrtqy boryshty tek eksportqa baǵdarlanǵan kompanııalar ǵana tartýǵa ruqsat beredi.

«Jalpy qaryz 10 trln teńge de dep aıtyp jatyrmyz. Onyń jartysy ózge de valıýtalarda kórsetilgen. Ózge de valıýtamen alatyn kompanııalar – tek qana eksportqa taýar shyǵaratyn kásiporyndar. ıAǵnı, bulardyń dollar, eýro, basqa da valıýtalarmen kiristeri bar. Sondyqtan osy kompanııalar ǵana ózge valıýtamen qaryz ala alady. Eń úlken qaryz paketin Qytaıdan aldyq dep aıtýǵa bolmaıdy. Sebebi eń úlken qaryz «QazMunaıGazǵa» tıesili. «QazMunaıGazdyń» eýrooblıgatsııalary bırjada ornalastyrylǵan qundy qaǵazdar. Ol jerde ınvestorlar qaı elden kelgenin aıta almaımyz. Mysaly, London bırjasynda oblıgatsııalar satylsa, árbir ınvestor kelip satyp ala alady. Sondyqtan tek Qytaı dep aıtýǵa bolmaıdy. Túrli-túrli ınvestor bar», - dedi Mırat Ótepov.