«Samuryq-Qazynanyń» qandaı aktıvteri IRO/SPO-ǵa shyǵaryldy

ASTANA. KAZINFORM –Ulttyq ekonomıka mınıstrligi «Samuryq-Qazynanyń» qandaı aktıvteri IRO/SPO-ǵa shyǵarylatynyn málim etti. 

— Teńgerimdik quny 2 trln teńgeden asatyn 500-ge jýyq memlekettik kompanııany qamtıtyn jańa Ońtaılandyrý jospary bekitildi (QR Úkimetiniń 2025 jylǵy 24 qazandaǵy № 894 qaýlysy). Kompanııalar otyn-energetıka kesheni, ónerkásip jáne ındýstrııa, agroónerkásiptik keshen, kólik jáne baılanys, qarjy naryqtary jáne t. b. salalarda usynylǵan. Ońtaılandyrý úsh kezeńde júzege asyrylady: 1-kezeń (2026 jyly), 2-kezeń (2027-2028 jyldary), 3-kezeń (2029-2039 jyldary). «Samuryq-Qazyna» AQ-nyń birqatar aktıvi boıynsha IRO/SPO ótkizý kózdeledi. Olardyń quramynda Kcell, «Qazaqtelekom» jáne «Qazaq Green Power PLC» jarııa kompanııasy bar, — dedi mınıstrlikten agenttiktiń resmı saýalyna oraı.

Vedomstvo málimetinshe, qor aktıvteriniń IPO/SPO-syn iske asyrý ınvestıtsııalar tartýǵa, kapıtal naryqtaryna qoljetimdilikti keńeıtýge, qor naryǵyn damytýǵa jáne kompanııalar qyzmetiniń ashyqtyǵyn arttyrýǵa baǵyttalǵan. Sonymen qatar mınıstrlik jekeshelendirýge shyǵarylǵan kompanııalardan túsimder árbir nysanǵa qatysty komıssııa aıqyndaıtyn bastapqy baǵaǵa baılanysty bolatynyn atap ótedi.

— Satý baǵasy saýda-sattyq qorytyndysy boıynsha anyqtalady. Memleket kásiporyndarǵa bóletin qarajat týraly málimetter Memlekettik tizilim veb-portalyndaǵy damý josparynda ornalastyrylady, — dedi Ulttyq ekonomıka mınıstrligi.

Buǵan deıin Premer-mınıstr jekeshelendirýge jatatyn aktıvterdiń jartysyn 2026 jyly satyp bitý kerektigin aıtqan edi.