«Samuryq-Qazynany» tarataıyq — Májilis depýtaty

ASTANA. KAZINFORM –2024 jylǵy bıýdjettiń atqarylýyn talqylaýǵa arnalǵan otyrysta Májilis depýtaty Ádil Jubanov «Samuryq-Qazynaı aktsıonerlik qoǵamyn taratyp jiberýdi usyndy. 

— Kvazımemlekettik sektor memlekettik satyp alý sharalarynyń 60 paıyzyn bir kózden ǵana ótkizgen. Sonshalyq asyǵys qımyldaıtyndaı qandaı tótenshe jaǵdaı, urys, soǵys bolyp jatyr? Sony túsinbeımin. Kemshilikti anyqtaǵan ekensizder. Biraq usynystaryńyzdy kórip otyrǵan joqpyn. «Samuryq-Qazyna» tapsyrystyń 60 paıyzyn bir kózge, «Báıterek» 50 paıyzyn bir kózge ótkizgen. Bul, oılap qarasańyz, búkil eldiń ulttyq qazynasyn, baılyǵyn urlaýǵa jeńil bolsyn dep bir qolǵa ákelip bergen. Mynaý degeniń baryp turǵan urlyq qoı. Aı men kúnniń amanynda, tym-tyrys, beıbit zamanda 60 paıyz, 50 paıyz bir kózden satyp alý degen, menińshe, eshbir zańǵa kelmeıdi, — degen Májilis depýtaty «Samuryq-qazyna» qoryn taratyp jiberýdi usyndy.

Ádil Jubanov «Samuryq-Qazynaı aktsıonerlik qoǵamyn taratyp jiberýdi usyndy.

— Jalpy men «Samuryq-Qazynanyń» bolýyna qarsymyn. Burynnan aıtyp kele jatyrmyn, taratylý kerek. Ondaǵy ár mekeme básekeli ortaǵa berilip, óz kúnin ózi kórý kerek. Joǵary aýdıtorlyq palatanyń osyǵan baılanysty ustanymy qandaı, — dep surady ol.

Joǵary aýdıtorlyq palata múshesi Nurlan Nurjanov naqty vedomstvonyń usynystary aýdıt tolyq aıaqtalǵannan keıin jarııalanatynyn eske saldy.

— Tapsyrystyń 60 paıyzyn bir kózge berý máselesine kelsek, byltyr da kótergenbiz. Bıyl da kóterip otyrmyz. Bizdi alańdatyp otyrǵan máseleniń ózi de osy. Shilde nemese tamyz aıynda qorǵa júrgizilip jatqan aýdıt aıaqtalý kerek. Barlyq usynysymyz ben sheshimderimizdi sol kezde aıtamyz, — dep qutyldy Joǵary aýdıtorlyq palata múshesi.

Sondaı-aq, ol Úkimet byltyr bıýdjettiń shyǵys bóligin 13 ret ózgertkenin atap ótti.