«Samuryq-Qazyna» jumysshylary 14 myń anonımdi aryz-shaǵym qaldyrǵan

Ulttyq qorǵa enshiles kompanııalardyń jumysshylary eńbek qaýipsizdigi jáne jaǵdaıy boıynsha shaǵymdanýdy azaıtqan, dep habarlaıdy QazAqparat tilshisi.

«24/7 rejıminde 5 baılanys arnasy arqyly áleýmettik shıelenis pen jumystaǵy qaqtyǵystar boıynsha jedel taldaý júrgiziledi. Bıyl 8 aıda «Nysana» baılanys ortalyǵyna 14 myńnan astam anonımdi habarlama kelip tústi. Atalǵan júıeniń artyqshylyǵy – anonımdi, baılanys arnalarynyń kóptigi, operatorlardyń 24/7 baılanysta bolýy jáne ár ótinish mindetti túrde qaralady. Kásiporyndardaǵy ereýilder sany bıyl 5,5 ese azaıǵan», - dedi «Samuryq-Qazyna» ulttyq qorynyń korporatıvtik basqarý, áleýmettik-eńbek máseleleri jáne eńbekti qorǵaý jónindegi basqarýshy dırektory Ǵıbrat Aýǵanov kompanııada ótken brıfıngte.

Onyń aıtýynsha, jumysshylardan kelip túsetin ótinishter men shaǵymdar «Áleýmettik turaqtylyq kartasynda» óńirler boıynsha tirkeledi.

«Aryz-shaǵymdy elektrondy poshta, telefon nómiri, Whatsapp, veb-saıt, QR-code arqyly qaldyrýǵa bolady. Bıyl ereýilder sany byltyrǵa qaraǵanda 5 jarym ese azaıdy. Al kompanııalar boıynsha qaýipti óńirler sany 2021 jylmen salystyrǵanda 3 ese qysqarǵan», - deıdi ol.

Sondaı-aq, «Samuryq-Qazyna» ókili ótinish, shaǵymdardyń qaraýsyz qalmaıtynyn aıtyp, sendirdi.