«Samuryq-Qazyna» Úkimettiń jańa qaýlysy qordyń dıvıdend saıasatyna qalaı áser etetinin aıtty

ASTANA. KAZINFORM — «Samuryq-Qazyna» aktsıonerlik qoǵamy keshe kúshine engen úkimet qaýlysynyń qordyń dıvıdent saıasatyna qalaı áser etetinin týraly túsinikteme berdi. 

Eske salsaq, atalǵan qujattyń buǵan deıingi redaktsııasynda «Esepti jyldyń qorytyndylary boıynsha jalǵyz aktsıonerge tólenetin jyl saıynǵy dıvıdendterdiń eń tómengi mólsheri 25 (jıyrma bes) mıllıard teńgeni quraıdy» degen arnaıy tarmaq bar bolatyn. Jańa redaktsııada osy tarmaq alynyp tastalǵan. 

— Qordyń dıvıdend saıasatyna engizilgen ózgerister jańa Bıýdjet kodeksiniń normalaryna sáıkestendirý úshin jasaldy. Jańa Bıýdjet kodeksiniń aıasynda qor Úkimetke aýdaratyn dıvıdenttiń mólsheri aktsııalary ózine tıesili zańdy tulǵalardan esepti jyldyń qorytyndysy boıynsha alatyn dıvıdendterdiń 50 paıyzynan kem bolmaý kerek dep aıqyndalǵan.

Mysaly, 2024 jyldyń qorytyndysy boıynsha qor alǵan dıvıdendterdiń kólemi 556 mlrd teńge bolǵanyn eskersek (2023 jyly 514 mlrd teńge boldy), jańa mınımaldy shek osy somanyń 50 paıyzynan kem bolmaýǵa tıis (278 mlrd teńge). Bul buǵan deıin bekitilgen 25 mlrd teńge deıtin mınımaldy shekten birneshe ese joǵary, — dep jazady qordyń baspasóz qyzmeti.

Qor usynǵan málimetke súıensek, «eń kemi 25 mlrd teńge» degen shektiń shynaıy aýdarymdardyń kólemine múlde áseri bolmaǵandaı.

— Onyń ústine qor óziniń jalǵyz aktsıoneriniń paıdasyna (Úkimetke — red.) taratqan aýdarymy 2024 jyly 1,36 trln teńge boldy. Bul jyl boıynda ózi alǵan dıvıdendterden birneshe ese kóp. Onyń ishinde respýblıkalyq bıýdjetke dıvıdend túrinde 737 mlrd teńge aýdardy. Qalǵan 568 mlrd teńgeni Úkimettiń tapsyrmasy boıynsha áleýmettik jáne ınfraqurylymdyq jobalarǵa baǵyttady. Onyń syrtynda «Qazaqstan halqyna» qoǵamdyq qoryna 50 mlrd teńge bóldi, — delingen túsindirmede.

«Samuryq-Qazyna» ókilderi Úkimet qaýlysynyń jańa redaktsııasy qordyń memleketke aýdaratyn dıvıdendterin kóbeıtpese, azaıtpaıtynyn aıtady.

— Jalpy qordyń dıvıdendterin aıqyndaý tásilin Bıýdjet kodeksimen bekitý «Samuryq-Qazynanyń» respýblıkalyq bıýdjet pen áleýmettik jobalarǵa bóletin aýdarymdaryn ulǵaıtýǵa baǵyttalǵan. Óıtkeni qabyldanǵan ózgerister aıasynda dıvıdendterdi esepteý bazasy júıe quraýshy kompanııalarmen shektelmeı, aktsııalary qorǵa tıesili zańdy tulǵalardyń bárinen túsetin túsimderdi qosý jolymen ulǵaıtylyp otyr, — dep jazylǵan resmı túsindirmede.