Samuryq-Qazyna transformatsııa baǵdarlamasynyń nege nátıje bermegenin túsindirdi
ASTANA. KAZINFORM — «Samuryq-Qazyna» 2018-2021 jyldarǵa arnalǵan transformatsııa baǵdarlamasynyń kútken nátıjege nelikten qol jetkize almaǵanyn túsindirdi.
- Transformatsııa baǵdarlamasy qorda 2014 jyldan bastap júzege asyrylyp keledi jáne bastapqyda portfeldik kompanııalardyń qunyn arttyrýǵa, ınvestıtsııalyq portfel qurylymyn ózgertýge, sondaı-aq qordyń korporatıvtik basqarý júıesin jańǵyrtýǵa baǵyttalǵan edi. Transformatsııa baǵdarlamasy qordyń alty negizgi portfeldik («QazMunaıGaz» AQ, «Qazaqstan Temir Joly» AQ, «Qazposhta» AQ, «Qazatomónerkásip» AQ, «Samuryq-Energo» AQ, «KEGOC» AQ) kompanııasynda iske asyryldy. 2014–2017 jyldary aralyǵynda transformatsııa baǵdarlamasy aıasynda qordyń jáne portfeldik kompanııalardyń strategııalyq qyzmet parametrleri jańartyldy. Basqarýshylyq jáne uıymdastyrýshylyq qurylym ońtaılandyryldy: Kadrlyq jáne HR-basqarý qyzmetteri kúsheıtildi, Sondaı-aq memlekettik organdarmen ózara is-áreketter qyzmeti keńeıtildi, - dep atap ótedi qordan agenttiktiń resmı saýalyna oraı.
Alaıda, baǵdarlamany iske asyrý barysynda onyń parametrlerin qaıta qaraý qajettiligi anyqtaldy. Bul óndiristik úderisterdi jetildirýge jáne tsıfrlyq tehnologııalardyń áleýetine jetkilikti kóńil bólinbeýine, joǵary basshylyqtyń qatysý deńgeıiniń tómendigine jáne birqatar ózge de máselege baılanysty boldy.
- 2018 jyly korporatıvtik qyzmetterdi transformatsııalaýdan qordyń tsıfrlyq transformatsııasyna kóshý týraly sheshim qabyldandy. Jańartylǵan transformatsııa baǵdarlamasynyń portfeli 56 jobadan jáne 98 is-sharadan turdy. Tsıfrlyq transformatsııaǵa jáne óndiristik protsesterdi tsıfrlandyrý jobalaryn engizý basty nazarda boldy. Keıin jobalar quramy portfeldik kompanııalardyń aǵymdaǵy qajettilikterine sáıkes turaqty túrde ózgertilip otyrdy: strategııalyq jáne operatsııalyq basymdyqtar ózgergen saıyn jekelegen bastamalar qosylyp nemese alynyp tastaldy, - dedi «Samuryq-Qazynadan».
Jaýapqa qaraǵanda, 2018-2023 jyldar aralyǵynda qor satyp alýlar rásimderin ońtaılandyrý, óndiristik protsesterdiń tıimdiligin arttyrý, IT-qyzmetterdi jetildirý, bıznesti damytý jáne korporatıvtik úderisterdi jaqsartý baǵyttarynda nátıjelerge qol jetkizdi.
Baǵdarlamany iske asyrý barysynda óndiristik protsesterge jiti kóńil bólmeý, joǵary basshylyqtyń qatysý deńgeıiniń tómendigi jáne basymdyqtardyń ózgerýine baılanysty jobalardy jıi túzetý sııaqty qıynshylyqtar baıqaldy. Bul jaǵdaılar josparlanǵan bastamalardy iske asyrý barysyn baıaýlatyp, osy kezeńdegi baǵdarlamanyń tıimdiligin tómendetti.
- Degenmen, 2014–2023 jyldary aralyǵyndaǵy transformatsııanyń jıyntyq rastalǵan taza paıdasy 186,5 mlrd teńgeni qurady. Bul qordyń jalpy shyǵyndarynan 45 paıyzǵa joǵary. 2023 jyly qordyń Dırektorlar keńesi transformatsııa baǵdarlamasynyń oryndalý qorytyndylary týraly eseptiń nátıjelerin portfeldik kompanııalardyń ishki aýdıt qyzmetterin tarta otyryp tekserýdi tapsyrdy. Osyǵan baılanysty ár portfeldik kompanııa óz Dırektorlar keńesinde jobalar men is-sharalardyń oryndalýyna qatysty derekterdi taldap, tekserýden ótkizdi, - delingen kompanııa málimetinde.
Aıta keteıik, Joǵary aýdıtorlyq palata «Samuryq-Qazyna» AQ men enshiles uıymdarynda memlekettik aktıvterdiń paıdalanylý tıimdiligine aýdıt júrgizip, 2018-2021 jyldarǵa arnalǵan transformatsııa baǵdarlamasy kútken nátıjege tolyq qol jetkizbegenin anyqtaǵan edi.