«Samuryq-Qazyna» tobynyń qaryzy qansha

ASTANA. KAZINFORM – Búgin Aqordada BAQ ókilderiniń saýalyna jaýap bergen «Samuryq-Qazyna» AQ basqarma tóraǵasy Nurlan Jaqypov qordyń qansha qaryzy bar ekenin aıtty. 

– Jalpy, «Samuryq-Qazyna» toby boıynsha qaryzymyz 10 trln teńgeden astam. Bul – biz úshin yńǵaıly deńgeı. Sebebi, biz eń aldymen kovenanttardy durys saqtap júrmiz. Ekinshiden, bizdiń búkil qarjylyq koeffıtsıentter jáne kovenanttar jasyl aımaqta, - dedi qor basshysy. 

Sonymen qatar ol quramyna kiretin kompanııalardyń shamamdan tys qaryzy joq ekenin basa aıtty.

– Bári jasyl aımaqta. Biz bul máseleni arnaıy baqylaýda ustap otyrmyz. Jahandyq tájirıbege sáıkes, barlyq qarjy ınstıtýty, kompanııalar óndiristik baǵdarlamalaryn iske asyrý úshin qaryz tartady, - dedi Nurlan Jaqypov. 

Aıta keteıik, búgin Aqordada Prezıdent Qasym-Jomart Toqaev pen elimizge resmı saparmen kelgen Iordanııa Koroli II Abdalla ben ál-Hýseın joǵary deńgeıde kelissózder ótkizedi.

Esterińizge sala ketsek, keshe Prezıdent Qasym-Jomart Toqaev Iordanııa Korolin Astana áýejaıynan qarsy alǵan edi. 

Mártebeli meıman mingen bortty el shekarasynan elordaǵa deıin Qazaqstan Respýblıkasy Áýe qorǵanysy kúshteriniń ushaqtary alyp júrdi.