«Samuryq-Qazyna» taǵy da qyzmetkerlerin qysqarta ma

ASTANA. KAZINFORM – «Samuryq-Qazyna» AQ Korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov Prezıdent Qasym-Jomart Toqaevtyń synynan keıin bolǵan qysqartý týraly pikir bildirdi

- Búginde tapsyrmany oryndadyq. Astana boıynsha qyzmetkerler sanyn 10 paıyz ońtaılandyrdyq. Basqasha aıtqanda, 729 shtat degen sóz. «Qazaqtelekom» da Astanadaǵy qyzmetkerlerin 10 paıyz qysqartty. Aılyqqa kelsek, ár kompanııanyń kestesi bar. Onyń mólsherin dırektorlar keńesi belgileıdi, - dedi Ǵıbrat Aýǵanov.

Sondaı-aq, ol «Samuryq» júıesinde taǵy qysqartý josparda joq ekenin aıtty.

- Biz tıisti jumysty atqardyq. Biraq bul ár kompanııanyń operatsııalyq qyzmetine baılanysty másele ǵoı. Qazir búkil kompanııalar tobynda ońtaılandyrý josparlanyp jatyr dep aıta almaımyz. Astanada qazirdiń ózinde qysqartý boldy, - dedi basqarýshy dırektor.

Onyń aıtýynsha, bul 729 adam «Samuryq» quramyna kiretin búkil ulttyq kompanııalardyń shtatynan qysqartylyp otyr.

- Olardyń bári básekege qabiletti, suranys bar mamandyq ıeleri deýge bolady. Sondyqtan jumys tabý jaǵynan qıyndyq bolady dep oılamaımyn. Mysaly, men basqaratyn qurylymnan qysqarǵan birneshe mamannyń qazirdiń ózinde «Samuryqtan» tys jańa jumysqa turǵanyn bilemin, - dedi ol.

Áýelde Samuryq-Qazyna elordadaǵy 6,5 myń qyzmetkerdiń 10 paıyzyn qysqartýdy josparlaǵan edi.