«Samuryq-Qazyna» ókilderi qordy taratýdy usynǵan depýtattyń synyna jaýap berdi
ASTANA. KAZINFORM — «Samuryq-Qazyna» aktsıonerlik qoǵamy Satyp alýlardyń ádisnamasy, baqylaý jáne monıtorıng departamentiniń dırektory Azamat Sembaı Májilis depýtaty Ádil Jubanovtyń synyna jaýap berdi.
Eske salsaq, depýtat «Samuryq-Qazyna» satyp alatyn taýarlar men qyzmetterdiń 60 paıyzyn bir kózden alatynyn aıtyp, qordy taratyp jiberýdi usynǵan bolatyn. Qordyń satyp alý saıasaty týraly baspasóz máslıhatynda jýrnalıster osy syndy korporatsııa ókilderiniń esine saldy.
— Jalpy satyp alýlar úlesi týraly áńgime bolǵanda negizgi úsh alpaýytty salystyryp jatady. Bul — Memlekettik satyp alýlar, kvazımemlekettik satyp alýlar jáne «Samuryq-qazyna» qorynyń satyp alýlary. Bizdiń qordyń satyp alýlaryna kelsek, memlekettik satyp alýlarǵa qaraǵanda úlken aıyrmashylyqtar bar. Biz birinshi kezekte óndiristik-kommertsııalyq mindetterge basymdyq beremiz. Óıtkeni portfeldik qorymyz negizinen óndiristik kompanııalar men júıe quraýshy kompanııalardan turady. Sondyqtan satyp alatyn taýarlary men qyzmetterdiń nomenklatýrasy múlde basqasha. Tıisinshe satyp alýlar tásili de basqasha, — dedi Azamat Sembaı.
Aıtýynsha, qor 2022 jyldan beri bir kózden satyp alýǵa negiz bolatyn faktorlardy qysqartyp jatqan kórinedi.
— Negizdemeler sany 47-den 18 deıin 47 paıyz qysqardy. Bir kózden satyp alýdyń negizgi úlesin holdıngtiń óz ishindegi kooperatsııalyq satyp alýlar alyp jatyr. Mysaly, munaı-gaz salasynda shıki munaıdy óńdeýshi zaýytqa deıin tasymaldaý kerek. Osy munaı tasıtyn qubyrdyń operatory «QazTransOıl» da «Qazmunaıgazdyń enshiles kompanııasy. Gaz tasymaldaıtyn qubyrdyń negizgi operatory da QazaqGaz-dyń quramyndaǵy qordyń enshiles kompanııasy. Tıisinshe, holdıng ishindegi kooperatsııa aıasynda kelisimsharttar jasaıdy. Elektr energııasyna kelsek, elektr qýatyn generatsııalaý úshin kómir satyp alý kerek. Bizdiń qordyń quramyna «Bogatyr Kómir» kiredi. Keıin osy kómirden óndirilgen elektr qýatyn eldi mekenderdegi tutynýshylarǵa jetkizý kerek. Bul jerdegi ulttyq operator KEGOK ta da bizdiń enshiles kompanııa. Qorǵa kiretin kásiporyndardyń bári de elektr qýatyn tutynady. Sáıkesinshe, olar da bir kózden satyp alady. Temirjol tasymaly da osyǵan uqsas. «Qazaqstan Temirjol» kompanııasy da qordyń quramyna kiredi. Sáıkesinshe, temirjol tasymalyna baılanysty satyp alýlardyń bári holdıng ishindegi kooperatsııa aıasynda bir kózden satyp alynady, — dedi ol.
«Samuryq-Qazyna» ókili búkil satyp alý protsesi Qarjy mınıstrligi men Básekelestikti qorǵaý jáne damytý agenttiginiń maquldaýynan ótetinin aıtady.
— Búkil satyp alý tásilderin memlekettik organdar maquldaǵan. Biz bir kózden satyp alý úlesin josparly túrde qysqarta beremiz. Keıingi eki jylda 50 paıyzdan artyq qysqarttyq. Buryn holdıng ishindegi kooperatsııa aıasynda bir kózden satyp alýdyń 208 negizdemesi bolsa, qazir 100 ǵana. Osy 108 negizdemeden basqa sebepterge baılanysty bir kózden satyp alýǵa jol joq, — dedi Azamat Sembaı.
Buǵan deıin Bektenov Samuryq-Qazynanyń otandyq óndirýshilerden taýar satyp alý kórsetkishin synaǵanyn jazdyq.