«Samuryq-Qazyna» QTJ aktsııalarynyń qosarlanǵan lıstıngine qatysty túsinik berdi
ASTANA. KAZINFORM – «Samuryq-Qazyna» qory buqaralyq aqparat quraldarynda jarııalanǵan «Qazaqstan temir joly» ulttyq kompanııasy» AQ aktsııalarynyń halyqaralyq jáne qazaqstandyq qor naryǵynda qosarlanǵan lıstıngi múmkindigi týraly habarlamalarǵa qatysty túsinikteme berdi.
- «Qazaqstan temir joly» AQ, IPO aldynda turǵan kez kelgen aktıv sııaqty, ınvestıtsııalyq tartymdylyǵyn arttyrý maqsatynda aldyn ala daıyndyq jumystaryn júrgizýdi talap etedi. Osyǵan baılanysty Úkimetpen birlesip tyǵyz ózara is-qımylda jáne kelisim boıynsha tıisti jumystar júrgizilip jatyr, - delingen qordyń baspasóz qyzmeti taratqan habarlamada.
Sonymen qatar halyqaralyq ınvestıtsııalyq bankterdiń baǵalaýy boıynsha, geosaıası jaǵdaı men naryqtyq ahýaldyń turaqtanýy – IPO-nyń sátti ótýiniń negizgi sharty. Buǵan qosa, ornalastyrý faktorlarynyń qatarynda QTJ-nyń 2025 jylǵy qarjylyq eseptiliginde tranzıttik kólemderdiń artýyna baılanysty nátıjeniń naqty kórinis tabýy, sondaı-aq kompanııanyń qaryz júktemesiniń bir bóligin qaıta qurylymdaý múmkindigi atap ótilgen.
- IPO-ny ótkizý merzimi men qurylymy, sonyń ishinde aktsııalar kólemi men ornalastyrý júrgiziletin uıymdastyrylǵan baǵaly qaǵazdar naryǵy aldyn ala daıyndyq is-sharalary aıaqtalǵan soń, ınvestıtsııalyq bankter túrindegi táýelsiz keńesshilerdiń usynymdaryn jáne qolaıly naryqtyq jaǵdaıdy eskere otyryp aıqyndalady, - dep túsindirdi «Samuryq-Qazyna» qory.
Sondaı-aq aktsııalardy ornalastyrýdan túsetin qarajat Úkimetpen kelisim boıynsha «Qazaqstan temir jolyn» damytýǵa baǵyttalatynyn aıtyldy.
Buǵan deıin «Qazaqstan temir joly» men QazaqGaz kompanııalary qashan IPO-ǵa shyǵarylatyny habarlandy.