«Samuryq-Qazyna» kompanııalarynda 2,5 myń kemtar adam jumys isteıdi
Ulttyq qor men oǵan enshiles kompanııalarda "erekshe jandar" eńbek etip jatyr. Olarǵa belgili bir deńgeıde jeńildikter qarastyrylǵan, dep habarlaıdy QazAqparat tilshisi.
«Qor jáne onyń portfeldik kompanııalary múmkindigi shekteýli qyzmetkerlerge qatysty únemi sharalar qabyldap otyrady. Búgingi tańda kompanııalar tobynda erekshe qajettiligi bar 2 582 adam jumys isteıdi. Olar úshin túrli jeńildikter qarastyrylǵan», - dedi «Samuryq-Qazyna» ulttyq qorynyń korporatıvtik basqarý, áleýmettik-eńbek máseleleri jáne eńbekti qorǵaý jónindegi basqarýshy dırektory Ǵıbrat Aýǵanov kompanııada ótken baspasóz máslıhatynda.
Qor ókiliniń málimdeýinshe, erekshe jandar úshin qysqartylǵan jumys kúnderi, qosymsha eńbek demalysy, saýyqtyrý ortalyqtaryna joldamalar jáne taǵy basqa qoldaý sharalary qarastyrylǵan.
Sondaı-aq, spıker kompanııada genderlik saıasattyń nazarda ekenin aıtty.
«Qorda «Genderlik teńdik» baǵdarlamasy júzege asyrylýda. Nátıjesinde 68 kóshbasshy áıelden turatyn pýl qalyptasty. Onyń 15-i Áıelder isteri jáne otbasylyq-demografııalyq saıasat jónindegi ulttyq komıssııaǵa táýelsiz sarapshylar men spıkerler bolyp taǵaıyndaldy. Al 16-sy dırektorlar keńesi jáne qadaǵalaýshy keńestiń múshesi boldy. Bul baǵyttaǵy jumys jalǵasyn tabady», - deıdi ol.
