«Samuryq-Qazyna» kompanııalar toby sý tasqynynyń saldaryn joıýǵa 15 mlrd teńge bóledi
ASTANA. KAZINFORM – Ál-aýqat qorynyń korporatıvtik ortalyǵyna «QazMunaıGaz», «Qazatomónerkásip», «Qazaqstan temir joly», «Qazaqgaz», «KEGOC», «Qazaqtelekom», «Air Astana» jáne «Samuryq-Energo» kompanııasy qarjy bóldi. Qarajat «Samruk-Kazyna Trust» biryńǵaı qaıyrymdylyq operatory arqyly jiberiledi.
Qor tabıǵı apattan zardap shekken óńirlerge materıaldyq kómek kórsetedi, barlyǵy 15 mlrd teńge. Bul týraly «Samuryq-Qazyna» AQ basqarma tóraǵasy Nurlan Jaqypov shtab otyrysynda málim etti.
«Tótenshe jaǵdaıda qyzmetkerlerdiń qaýipsizdigi men jabdyqtyń tutastyǵyn qamtamasyz etý portfeldik kompanııalardyń aldynda turǵan basym mindetterdiń biri. Qazir tótenshe jaǵdaıdyń aldyn alý úshin kúshterdi jandandyrý qajet. Osy oraıda qaýiptiń aldyn alý jumystaryn, sondaı-aq zardap shekken óndiristik obektilerdiń jumysyn shtattyq rejımge keltirý jónindegi is-sharalardy jalǵastyrý qajet», - dedi Nurlan Jaqypov.
Sý tasqynynyń alǵashqy kúninen bastap qordyń enshiles jáne táýeldi uıymdarynyń erikti avarııalyq-qutqarý qyzmetteriniń kúshteri men quraldary jumyldyryldy. Olar Tótenshe jaǵdaılar mınıstrliginiń bólimshelerine jáne jergilikti atqarýshy organdarǵa kómek kórsetýde.
«QazMunaıGaz» ulttyq kompanııasynyń basqarma tóraǵasy Maǵzum Myrzaǵalıevtiń aıtýynsha, sý tasqynyna qarsy is-sharalarǵa 500-den astam qyzmetker jumyldyrylǵan, 160-tan astam tehnıka men jabdyq, sondaı-aq 80 tonna dızel, 22 tonna benzın bólingen.
«Qazaqstan temir joly» ulttyq kompanııasy 45 poıyz daıyndady. Sý tasqynynan zardap shekken barlyq óńirlerde sý aıdaýdy júzege asyratyn 47 órt sóndirý poıyzynyń kezekshiligi uıymdastyryldy. Bul týraly QTJ basshysy Nurlan Saýranbaev málim etti.
Sondaı-aq, poıyzdar azamattardy evakýatsııalaýǵa tartyldy, 8 sáýir kúni tańerteń Atyraý oblysynda poıyzdardy QTJ qarajaty esebinen 5 myńǵa jýyq qazaqstandyq tasymaldandy.
«QazaqGaz» ulttyq kompanııasy avarııalyq-qutqarý jáne sý tasqynyna qarsy jumystarǵa 750 adam jumyldyrdy, sý tasqynyna qarsy is-qımyl boıynsha jumystarǵa 135 tehnıka bólindi, sý basý óńirlerinde volonterler toby quryldy.
«KEGOC» AQ elektr berý jelilerin, ǵımarattar men qurylystardy erigen sýdyń áserinen qorǵaý sharalaryn qabyldady.
«Sonymen qatar sý basýy múmkin áýe jelilerine baqylaý uıymdastyrdy, elektr jelilerinde avarııalyq-qalpyna keltirý jumystaryn júrgizý úshin brıgadalar uıymdastyryldy», - dedi Nábı Aıtjanov.
«Qazaqtelekom» AQ-da telekommýnıkatsııa quraldarynyń úzdiksiz jumysyn qamtamasyz etý úshin kompanııanyń tehnıkalyq blogy jedel shtabtar qurdy. Bólimsheler arasynda baılanys ortalyqtary uıymdastyrylyp, avarııalyq-qalpyna keltirý baılanys komandalary quryldy. Qyzmetkerler sý tasqyny saldarynan zaqymdanǵan jabdyqtar aqaýyn tez arada joıady.
Qor tobynyń qyzmetkerleri zardap shekken otbasylarǵa azyq-túlik, turmystyq zattar jáne basqa da kómek kórsetip jatyr.
Nurlan Jaqypov sý tasqyny jaǵdaıy týraly táýligine birneshe ret habarlaýdy jáne máseleni baqylaýda ustaýdy tapsyrdy, sondaı-aq apat zardaptaryn joıýǵa tartylǵan barlyq top qyzmetkerlerine alǵysyn bildirdi.
