«Samuryq-Qazyna» qoldaýymen Astanada sporttyq bıden jastar arasyndaǵy álem chempıonaty ótip jatyr
ASTANA. KAZINFORM — 24–25 qazanda Qazaqstan alǵash ret Dúnıejúzilik bı sporty federatsııasynyń (WDSF) Youth Solo Latin sanatyndaǵy qyzdar arasyndaǵy álem chempıonatyn qabyldap otyr. Álem chempıony ataǵy úshin 15 elden kelgen 69 sportshy baq synaýda. Olardyń qatarynda Qazaqstannyń 34 ókili bar. Jarystyń bas seriktesi — «Samuryq-Qazyna» AQ.
Álem chempıonatyn Qazaqstan Respýblıkasynyń Sporttyq bı federatsııalary qaýymdastyǵy «Samuryq-Qazyna» kompanııalar tobynyń qaıyrymdylyq jobalarynyń biryńǵaı operatory — Samruk-Kazyna Trust korporatıvtik qorynyń qoldaýymen uıymdastyrdy.
24 qazanda Astanadaǵy Kongress-ortalyqta álem chempıonatynyń resmı ashylý saltanaty ótti. Іs-sharaǵa Astana qalasynyń ákimi Jeńis Qasymbek, Qazaqstan Respýblıkasynyń Týrızm jáne sport mınıstri Erbol Myrzabosynov, «Samuryq-Qazyna» AQ basqarýshy dırektory Ǵıbrat Aýǵanov, sport uıymdarynyń ókilderi, bı sporty qaýymdastyǵynyń músheleri, halyqaralyq tóreshiler, jattyqtyrýshylar men sportshylar qatysty.
Chempıonatqa Armenııa, Bolgarııa, Grýzııa, Italııa, Qyrǵyzstan, Túrkııa, Ózbekstan, Chehııa, Shvetsııa syndy 15 memleketten kelgen 69 sportshy qatysyp jatyr. 2008–2014 jyldary týǵan qyzdar Solo Latin sanatynda latynamerıkalyq baǵdarlama boıynsha óner kórsetedi. Qazaqstan atynan 34 sportshy synǵa túsip jatyr.
Qazaqstan WDSF-tiń osy sanattaǵy álem chempıonatyn alǵash ret ótkizip otyr. Mundaı deńgeıdegi jarystar elimizde sporttyq bıdiń damýyna serpin berip, halyqaralyq tájirıbe almasýǵa jol ashady. Sonymen qatar jas qazaqstandyq sportshylarǵa álemdik arenada óz sheberligin kórsetýge múmkindik beredi. «Samuryq-Qazyna» AQ basqarýshy dırektory Ǵıbrat Aýǵanovtyń aıtýynsha, álemdik birinishiliktiń Qazaqstanda ótýi elde sporttyq bıdiń damýyna jańa serpin berip, jas sportshylardy jigerlendiredi.
— Bıyl «Samuryq-Qazyna» AQ-nyń qurylǵanyna 20 jyl tolyp otyr. Osy ýaqyt ishinde kompanııalar tobynyń qoldaýymen sport, mádenıet, ınklıýzıvti bilim berý jáne beıimdelgen sport salalarynda júzdegen joba júzege asyryldy. Búginde bul bastamalar jyl saıyn 1 mıllıonnan astam qazaqstandyqqa jańa múmkindikter syılap keledi. Biz úshin mundaı jobalardyń mańyzy erekshe. Olardyń basty maqsaty — adamdarǵa naqty kómek kórsetý, balalar men jastardyń qabiletin ashýǵa jaǵdaı jasaý jáne árqaısysynyń óz áleýetin tolyq iske asyrýyna múmkindik berý, — dedi ol.
Qordyń qoldaýymen ashylǵan 55 ońaltý ortalyǵynda jyl saıyn 21 myńnan astam bala tegin ońaltý kómegin alady. Mektepterdegi ınklıýzııany qoldaý kabınetterinde 3 myń balaǵa bilim alýyna jáne damýyna qajetti kómek kórsetiledi. Budan bólek, kompanııalar tobynyń qoldaýymen ashylǵan 19 sport kesheni jyl saıyn 245 myń adamǵa sportpen tegin shuǵyldanýǵa múmkindik beredi.
Qazaqstandyq sportshylar úshin bul chempıonattyń orny erekshe. Olar óz elinde, óz jankúıerleriniń aldynda óner kórsetip, basqa memleketterden kelgen myqty qurdastarymen baq synaıdy. Mundaı jarystar jas bıshilerdiń halyqaralyq tájirıbe jınaqtaýyna, sheberligin shyńdaýyna jáne kásibı maqsattaryn aıqyndaýyna yqpal etedi. Sonymen qatar jattyqtyrýshylardyń kásibı áleýetin arttyryp, sporttyq bı salasyndaǵy halyqaralyq baılanysty nyǵaıtýǵa jol ashady.
