«Samuryq-Qazynaǵa» qańtardyń sońyna deıin úsh qalada JEO salý máselesin sheshý mindetteldi

ASTANA. KAZINFORM — Premer-mınıstr Oljas Bektenov Úkimet otyrysynda «Samuryq-Qazyna» qorynyń basshylyǵyna birneshe tapsyrma berdi.

— Memleket basshysy kómir generatsııasyn damytýdyń jáne jańa jylý elektr ortalyqtary jobalaryn iske asyrýdyń mańyzdylyǵyn atap ótti. Osyǵan baılanysty «Samuryq-Qazyna» qoryna qańtar aıynyń sońyna deıin Kókshetaý, Semeı jáne Óskemen qalalarynda jylý elektr ortalyqtaryn salý jobalaryn iske asyrý boıynsha kelisimsharttardy bekitýdi tapsyramyn. Qurylys jumystaryna aldymyzdaǵy sáýir aıynda kirisý kerek, — dedi ol.

Úkimet basshysy Energetıka mınıstrligine bir aıdyń ishinde kómir generatsııasyn damytý jónindegi ulttyq jobany Úkimetke engizýdi tapsyrdy.

— Memleket basshysy elde energııa resýrstaryna suranys ósip otyrǵan qazirgideı jaǵdaıda geologııalyq barlaý jumystaryn jandandyrý, kómirsýtekterdiń jańa ken oryndaryn ıgerý jáne iri gaz óńdeý zaýyttaryn ýaqtyly iske qosý qajettigin atap ótti. Energetıka mınıstrligine «Samuryq-Qazyna» qorymen birge aqpan aıynyń sońyna qaraı munaı men gazdyń jańa ken oryndaryn ıgerýdiń egjeı-tegjeıli josparyn engizýdi tapsyramyn. Sonymen qatar «Samuryq-Qazyna» qory gaz óńdeý jobalaryn iske asyrý kestesiniń saqtalýyn qatań baqylaýdy qamtamasyz etip, aı saıyn meni tikeleı habardar etip otyrsyn, — dedi Oljas Bektenov. 

Aıta keteıik, Prezıdent Qasym-Jomart Toqaev V Ulttyq quryltaıda Kókshetaý, Semeı, Óskemen qalalarynda salynýy kerek bolǵan jańa jylý-elektr ortalyqtarynyń qurylysy tym uzaqqa sozylyp bara jatqanyn synaǵan bolatyn.