«Samuryq-Qazyna» basshysy depýtattardyń synyna jaýap berdi

ASTANA. KAZINFORM — «Samuryq-Qazyna» AQ basqarma tóraǵasy Nurlan Jaqypov «Samuryq-Qazyna» qory ekonomıkalyq ósýdiń draıveri emes, tejegishine aınaldy degen synǵa jaýap berdi. 

— Sońǵy 4 jylda syrtqy kúrdeli jaǵdaıǵa qaramastan, aktıvter qunynyń ortasha jyldyq ósimi 11%-dy qurap otyr. Taza tabys ósimi jylyna orta eseppen 13%, al kiris 12%-ǵa jetti. Meniń oıymsha, bul qordyń tabysty jumys istep, damyp jatqanyn aıqyndaıtyn mańyzdy kórsetkish, — dedi Nurlan Jaqypov elordada ótken baspasóz máslıhatynda.

Basqarma tóraǵasynyń málimdeýinshe, qordyń negizgi mindeti — aktıvterdiń qunyn arttyrý.

— Eger aktıvterdi memlekettik organdarǵa beretin bolsaq, múdde qaqtyǵysy týyndaıdy. Memlekettik organdardyń tabys tabý maqsaty joq. Olardyń mindeti — áleýmettik turaqtylyqty qamtamasyz etý. Sondyqtan da qor — aktıvterdiń ekonomıkalyq qunyn arttyrý boıynsha tıimdi qural dep sanaımyn, — dedi ol.

Keshe Májilis depýtaty Ádil Jubanov Premer-mınıstrdiń atyna saýal joldap, «Samuryq-Qazyna» qory Qazaqstan ekonomıkasynyń draıveri emes, tejeýishi dep synaǵan edi. 

Aıta keteıik, «Samuryq-Qazyna» qory qyzmetine memlekettik aýdıt júrip jatyr. Onyń nátıjesi maýsymnyń sońynda shyǵady. 

Sondaı-aq qor basshysy Nurlan Jaqypov «Samuryq-Qazyna» jalpy ishki ónimniń 50-60 paıyzyn quraıdy degen aqparatty joqqa shyǵardy.