Prezıdent «Samuryq-Qazynanyń» 2027-2029 jyldarǵa arnalǵan 21 trln teńgelik josparymen tanysty
ASTANA. KAZINFORM - Memleket basshysy «Samuryq-Qazyna» AQ basqarma tóraǵasy Nurlan Jaqypovty qabyldady, dep habarlaıdy Aqordanyń baspasóz qyzmeti.
Prezıdent Qasym-Jomart Toqaev «Samuryq-Qazyna» qorynyń qyzmeti, negizgi óndiristik jáne qarjylyq kórsetkishterdiń oryndalýy jáne iri ınfraqurylymdyq jobalardyń júzege asyrylýy týraly esepti tyńdady.
Nurlan Jaqypovtyń aıtýynsha, 2026 jyly Qor 3,2 trıllıon teńgeniń ınvestıtsııalyq jobalaryn túıindeýdi josparlap otyr. Sonyń ishinde Moıynty – Qyzyljar, Darbaza – Maqtaaral temirjol jelilerin salý, Altynkól – Jetigen, Beıneý – Mańǵystaý temirjol ýchaskelerin jańǵyrtý, Qashaǵan ken ornyndaǵy gaz óńdeý zaýytynyń qurylysy, Almaty ekinshi jylý elektr ortalyǵyn jańǵyrtý, Túrkistan oblysynda bý-gaz qondyrǵysyn jáne gıbrıdti elektr stantsııasyn salý jobasy bar. Sonymen qatar Astanadaǵy derekterdi óńdeý ortalyǵynyń qurylysy men Kaspıı teńiziniń tabanyna talshyqty-optıkalyq baılanys jelisin tóseý jumystary aıaqtalýǵa jaqyn.
Prezıdentke Qordyń ınvestıtsııalyq portfeli jóninde málimet berildi. Atalǵan baǵytta 2027-2029 jyldary energetıka, munaı-gaz sektory, kólik jáne tsıfrlyq ınfraqurylym salalary boıynsha 21 trıllıon teńgege 38 jobany iske asyrý kózdelip otyr.
Budan bólek, Nurlan Jaqypov Qordyń áleýmettik jobalarynyń oryndalýy týraly baıandady. Medıtsınalyq jáne áleýmettik nysandar salýǵa basymdyq berilip, múgedektigi bar balalarǵa arnalǵan 55 ortalyq jáne 46 ınklıýzııa kabıneti ashylǵan, sporttyq jáne bilim berý ınfraqurylymyn damytýǵa nazar aýdarylyp otyr.
Kezdesý sońynda Qasym-Jomart Toqaev Qor jumysynyń negizgi baǵyttaryna qatysty birqatar mindet júktedi.
Osyǵan deıin Prezıdent Qarjy naryǵyn retteý jáne damytý agenttiginiń tóraǵasy Mádına Ábilqasymovany qabyldaǵan bolatyn.
