«Samuryq-Qazyna» Air Astana-daǵy úlesin 41%-ǵa deıin azaıtpaqshy
ASTANA. KAZINFORM – «Samuryq-Qazyna» aktsıonerlik qoǵamynyń basqarma tóraǵasy Nurlan Jaqypov Jibek Joly arnasyna bergen suhbatynda Air Astana áýe kompanııasyn IPO-ǵa shyǵarý qalaı iske asatynyn aıtty.
«Biz keshe Air Astana kompanııasy IPO-ǵa shyǵarylatynyn jarııaladyq. Ótken juma kúni IPO-ǵa shyǵarylatyn aktsııalardyń baǵa kókjıegi bekitilgen. Aktsııalarmen birge menshik quqyǵyn rastaıtyn qujaty da birge shyǵarylady. Olardyń baǵa kókjıegi 8,5-11 dollar aralyǵynda. Mundaı bir depozıtarlyq qolhatta 4 aktsııadan bolady» - dedi Nurlan Jaqypov.
Sondaı-aq, memleket 2002 jyly Air Astana qurylǵan kezde 8,5 mln dollar salǵanyn aıtty.
«Air Astana qurylǵannan beri bizge 80 mln dollardan astam dıvıdend aýdaryp, 711 mln dollardan astam salyq tóledi. 2022 jyly salǵan ınvestıtsııa men ınvestorlarǵa usynylyp otyrǵan qazirgi baǵa kókjıegin salystyrsaq, kompanııa quny 77 ese ósken», - dedi ol.
«Samuryq-Qazyna» áýe kompanııasyn IPO-ǵa shyǵarý arqyly 300 mln dollardyń ınvestıtsııasyn tartpaqshy.
«Onyń 120 mln dollary kompanııanyń ózinde qalady. Bul qarajat jańa áýe kemelerin satyp alý sııaqty kúrdeli shyǵyndarǵa jumsalady. Qalǵan 180 mln dollar ınvestorlardyń tabysyna jumsalady. Biz bul kompanııadaǵy úlesimizdi 41%-ǵa deıin túsirýdi josparlap otyrmyz», – dedi holdıng basshysy.
