«Samuryq-Qazyna» 7 aıda 12,5 trln teńge kiris kirgizgen
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov «Samuryq-Qazyna» AQ dırektorlar keńesiniń otyrysyn ótkizdi. Onda Qor qyzmetiniń negizgi nátıjeleri, onyń ishinde óndiristik jáne qarjylyq kórsetkishter, sondaı-aq otandyq taýar óndirýshilerdi qoldaý máseleleri qaraldy. Bul týraly Úkimettiń baspasóz qyzmeti málim etti.
«Samuryq-Qazyna» AQ basqarma tóraǵasy Nurlan Jaqypov 2026 jylǵy qańtar-shilde aılarynyń qorytyndysy boıynsha Qordyń kirisi 12,5 trln teńgeni qurap, josparly kórsetkishten 5%-ǵa asqanyn baıandady. Sondaı-aq EBITDA — 3,4 trln teńge boldy, bul jospardan 7%-ǵa joǵary, taza paıda 1,2 trln teńgeni qurap, josparly kórsetkishten 4%-ǵa artqan.
— Satyp alýlar arqyly otandyq taýar óndirýshilerdi qoldaý jáne otandyq óndiristi damytý sheńberinde Top kompanııalary jyl basynan beri jergilikti taýar óndirýshilermen 694 mlrd teńgege kelisimsharttar jasady. Bul ótken jyldyń sáıkes kezeńimen salystyrǵanda 32%-ǵa kóp. Satyp alý júıesinde otandyq óndirýshilerdi qoldaýdyń 16-dan astam sharasy qoldanylady. Onyń ishinde qazaqstandyq taýarlarǵa basymdyq berý, uzaqmerzimdi sharttar jasasý, 30% mólsherinde mindetti avans berý jáne jedel tólem júrgizý tetikteri bar, — delingen habarlamada.
2026 jylǵy qańtar-shilde aılarynda 52,8 mlrd teńgege ofteık-kelisimsharttar jasaldy. Ǵylym men ınnovatsııalardy damytý bóliginde ǵylymı-zertteý jáne tájirıbelik-konstrýktorlyq jumystar portfeli 13,9 mlrd teńge somasyndaǵy 55 jobany qamtıdy, onyń ishinde 7 joba aıaqtaldy.
Oljas Bektenov ınvestıtsııalyq jobalardy ýaqtyly júzege asyrý jáne Toptyń satyp alý júıesin odan ári jetildirý jóninde birqatar tapsyrma berdi.
Eske sala keteıik, ERG-degi memlekettiń 40 paıyzdyq úlesi «Samuryq-Qazynaǵa» ótti.
