«Samuryq-Qazyna» 177 mlrd teńgeniń taýary men qyzmetin sheteldik jetkizýshilerden «bir kózden» satyp alǵan

ASTANA. KAZINFORM – «Samuryq-Qazyna» aktsıonerlik qoǵamy satyp alatyn taýarlar men qyzmetterdiń 17,5 paıyzy – ımport. Osy ımporttyq taýar men qyzmetterdiń 39 paıyzyn «bir kózden satyp alý» qaǵıdatymen alǵan.

Qordyń satyp salý saıasatyna arnalǵan baspasóz máslıhatynda Satyp alýlar ádisnamasy, baqylaý jáne monıtorıng departamentiniń dırektory Azamat Sembaı osyndaı derek aıtty.

- 2024 jyldyń qorytyndysy boıynsha Qor tobynyń taýarlar, jumystar men kórsetiletin qyzmetterdi satyp alýlaryndaǵy el ishindegi qun úlesi 82,5% boldy. Biraq bul qalǵan 18% taýarlar men qyzmetter mindetti túrde ımport degen sóz emes. ıAǵnı, 18% kórsetkish – bul ST-KZ sertıfıkaty joq jumystar men qyzmetterdiń úlesi, - deıdi qor ókili.

Sondaı-aq, ol qor satyp alǵan ST-KZ sertıfıkaty joq taýarlar men qyzmetterdiń 39%-yn bir kózden satyp alǵanyn atap ótti.

- El ishindegi qun úlesi nólge teń taýarlar, jumystar men qyzmetterdiń 39%-y, ıaǵnı 177 mlrd teńgege jýyq soma bir kózden satyp alý tásilimen alynǵan. Buǵan jatatyn negizgi pozıtsııalar: kúkirt qyshqyly, teplovoz, munaı óńdeý katalızatory jáne tabıǵı gaz, - dedi Azamat Sembaı.

Sondaı-aq, ol «Samuryq-Qazyna» EAEO elderinen 76,2 mlrd teńgeniń taýary men qyzmetin satyp alǵanyn málim etti.