«Samuryq-Qazyna» 122 mlrd teńgeni tıimsiz jumsaǵan - Joǵary aýdıtorlyq palata
ASTANA. KAZINFORM - QR Joǵary aýdıtorlyq palatasy «Samuryq-Qazyna» AQ men enshiles uıymdarynda memlekettik aktıvterdiń paıdalanylý tıimdiligine aýdıt júrgizip, strategııalyq basqarý júıesiniń jaǵdaıyn baǵalady.
Tekserý qordyń korporatıvtik ortalyq retindegi qyzmetin, sondaı-aq «Qazatomónerkásip», «Samruk-Kazyna Ondeu» jáne basqa da birqatar kompanııany qamtydy. Barlyǵy 18 zańdy tulǵada aýdıt júrgizilip, Parlament depýtattary men qoǵam tarapynan túsken saýaldar eskerildi.
2024 jyldyń qorytyndysy boıynsha qor kompanııalar tobynyń kirisi 16,5 trln teńgeni, al shoǵyrlandyrylǵan taza paıdasy 2,4 trln teńgeni qurady.
- Aýdıt qamtyǵan kezeńde holdıng memleketke 2,37 trln teńge aýdarǵan. Onyń 779,9 mlrd teńgesi dıvıdendter túrinde, 1,6 trln teńgesi aktıvterdi básekelestik ortaǵa berý esebinen tólengen. Buǵan qosa qor Prezıdent pen Úkimet tapsyrmalaryn oryndaý úshin qosymsha 673 mlrd teńge baǵyttaǵan.
Tekserý barysynda strategııalyq josparlaý men basqarýda eleýli kemshilikter anyqtaldy.
2018-2021 jyldarǵa arnalǵan transformatsııa baǵdarlamasy kútken nátıjege tolyq jetkizbegen: 8 kompanııany sheteldik analogtar deńgeıine shyǵarý maqsaty oryndalmaǵan. Baǵdarlamadan túsken naqty paıda 154,5 mlrd teńge boldy, bul josparlanǵan kórsetkishten eki ese tómen, - dep jazdy palatadan.
Korporatıvtik basqarý deńgeıiniń jetkiliksizdigi de baıqalǵan. Strategııalyq qujattardy sapaly ázirlemeý, josparly kórsetkishterdi tómendetý faktileri tirkelgen. Holdıngtiń damý josparynyń oryndalýyna baqylaý kúsheıtilýi tıis.
- Qor qoldanatyn aqparattyq júıeler de jetkiliksiz. 7 júıeniń tek 4-eýi qoldanysta, basqarýshylyq esep júrgizýge arnalǵan SAP BPC júıesi durys jumys istemeıdi. Birqatar kompanııada qarjylyq esep áli de qolmen júrgiziledi.
Іshki normatıvtik qujattardy júıeleý máselesi de ózekti. Qordaǵy qujattardyń shamamen 15 paıyzy qoldanylmaıdy, qaıta qaraýdy nemese kúshin joıýdy qajet etedi.
«Samuryq-Qazyna» AQ dırektorlar keńesi janyndaǵy 5 komıtettiń 3-eýi jáne qor basqarmasy janyndaǵy 7 komıtettiń 2-eýi sońǵy kezeńde jumys istemegen. Bul holdıngtiń basqarý qurylymynyń kúrdeliligin kórsetedi, - delingen aqparatta.
Holdıngtiń ózine qarasty qurylymynda 6 deńgeıge bólingen 326 kompanııa bar. 2020-2024 jyldary qor tobynda 23 belsendi emes kompanııa bolǵan, al 2024 jyldyń qorytyndysy boıynsha 41 kompanııa jumysty shyǵynmen aıaqtaǵan. Bul aktıvterdi ońtaılandyrý qajettiligin aıqyn kórsetedi.
Investıtsııalyq jobalardy basqarý men baqylaýda da problemalar anyqtaldy. 2020 jyldan 2024 jylǵy 30 qyrkúıekke deıingi kezeńde qor kompanııalarynyń 175 jobasynyń tek 49-y ǵana aıaqtalǵan.
Aýdıt qorytyndysy boıynsha:
- 351,8 mln teńge kóleminde qarjylyq buzýshylyq,
- 122,2 mlrd teńgege tıimsiz josparlaý jáne qarajatty paıdalaný faktileri,
- 119 júıelik kemshilik tirkeldi.
Birqatar materıal ákimshilik is qozǵaý úshin joldandy, al keıbir buzýshylyqtar boıynsha materıaldar quqyq qorǵaý organdaryna berildi.
Aıta keteıik, «Samuryq-Qazyna» QTJ aktsııalarynyń qosarlanǵan lıstıngine qatysty túsinik berdi.