Samsung-tyń burynǵy qyzmetkeri jymqyrǵan 2,7 mln dollaryn qaıtardy - Bas prokýratýra
ASTANA. QazAqparat - Mıllıardtaǵan qarjy urlady degen kúdikpen «Samsung Electronics» kompanııasynyń burynǵy qyzmetkeri AQSh-tan Qazaqstanǵa qaıtaryldy, dep habarlaıdy QR Bas prokýratýrasy Feısbýktegi paraqshasynda.
«Atalǵan kompanııanyń burynǵy qyzmetkeri T.J. Naýryzbaevty elge qaıtarý Qazaqstan Respýblıkasynyń Bas prokýratýrasy men AQSh Ádilet departamentiniń Tergeý federaldy bıýrosy arasyndaǵy yntymaqtastyǵynyń nátıjesinde múmkin boldy. T.J.Naýryzbaev 4 mln astam dollardy qoldy qylǵan», - delingen habarlamada.
Bas prokýratýranyń habarlaýynsha, taraptardyń úılesimdi jumysynyń arqasynda jábirlenýshi kompanııaǵa qarajatynyń kóp bóligi (2,7 mln AQSh dollar) óndirilgen.
Ótken jyldyń sońynda Naýryzbaev Qazaqstanǵa AQSh-tan deportatsııalandy. Ol bıylǵy jyldyń aqpan aıynda Medeý aýdandyq sottyń úkimimen Qylmystyq kodekstiń 190-babynyń 4-bóligi 2-tarmaǵymen kináli dep tanylyp, 5 jylǵa bas bostandyǵynan aıyryldy.
