«Samsung-tiń» enshiles kompanııasy Qytaıda iri avtoakkýmýlıator zaýytyn salmaq
ASTANA. 24 qańtar. QazAqparat - Samsung Electronics-tiń enshiles kásiporny - Ońtústik Koreıanyń Samsung SDI kompanııasy soltústik-batys Qytaıdaǵy Shensı provıntsııasynyń ákimshilik ortalyǵy - Sıanıde QHR-daǵy asa iri elektromobılderge arnalǵan akkýmýlıatorlar shyǵaratyn zaýyt salmaqshy, dep habarlady ITAR-TASS.
Jobaǵa salynatyn ınvestıtsııa qory 600 mıllıon dollardy quraıdy. Jergilikti BAQ ókilderiniń habarlaýynsha, osy ońtústikkoreılik kompanııanyń, qytaılyq Anqing Ring New Group avtobólshekter óndirýshiniń jáne Gaoke korporatsııasynyń arasynda tıisti ýaǵdalastyqqa qol jetkizildi.
«Bul jobanyń júzege asyrylýy bizdiń kompanııamyzǵa elektromobılder áleminde senimdi oryn alýǵa múmkindik beredi», dep jazady Samsung SDI kompanııasynyń dırektory Pak San Dın. Zaýyt qurylysy bıylǵy jyldyń ekinshi jartysynda bastalady, al, kásiporyn 2015 jyly paıdalanýǵa beriledi, dep josparlanýda.
Bul joba Samsung SDI kompanııasynyń sheteldegi eń alǵashqy iri óndiris orny bolmaq. Qazirgi kezde kompanııanyń avtoakkýmýlıatorlar óndiretin bir fabrıkasy bar, ol Ońtústik Koreıadaǵy Ýlsan qalasynda ornalasqan. Samsung SDI kompanııasy BMW jáne Chrysler tárizdi avtomobıl óndirýshileri úshin elektromobılderdi akkýmýlıator batareıalarymen jabdyqtaıdy. Búgingi tańda kásiporyn Tesla Motors kompanııasymen kelissózder júrgizýde.
