Samsung teledıdar qaptamasyndaǵy fotoǵa qatysty Dýa Lıpanyń talabyna jaýap berdi
ASTANA. KAZINFORM – Samsung Electronics kompanııasy brıtandyq ánshi Dýa Lıpanyń óz fotosyn teledıdar qaptamasynda zańsyz paıdalandy degen aıyptaýlaryn joqqa shyǵardy, dep habarlaıdy Yonhap agenttigi.
Kompanııa ókilderiniń málimdeýinshe, sýretti qoldanýǵa ruqsat úshinshi tarap kontent-seriktesi arqyly alynǵan.
Eske salsaq, ánshiniń komandasy AQSh-tyń Kalıfornııa shtaty Ortalyq okrýginiń sotyna talap aryz bergen edi. Ártistiń ókilderi Samsung-ty avtorlyq quqyqty, taýar belgisin jáne beıneni jarııa paıdalaný quqyǵyn buzdy dep aıyptap, 15 mıllıon dollar ótemaqy talap etip otyr.
Al kompanııa ókilderi Dýa Lıpanyń fotosy Samsung TV Plus servısi arqyly teledıdarlarda qoljetimdi seriktestik kontentti kórsetý maqsatynda paıdalanylǵanyn aıtty.
Fotosýretti platforma seriktesteriniń biri usynǵan. Ol barlyq qajetti ruqsattyń, sonyń ishinde sýretti bólshek saýda qaptamasynda qoldanýǵa kelisimniń bar ekenin rastaǵan.
Samsung sondaı-aq óner ıeleriniń ıntellektýaldyq menshigine qurmetpen qaraıtynyn jáne daýdy retteý áreketterin jalǵastyryp jatqanyn málimdedi.
Ánshi ókilderi bul máseleni 2025 jyldyń jazynda kótergennen keıin Samsung Dýa Lıpa beınelengen qaptamalardy shyǵarýdy toqtatyp, dızaındy ózgertken jáne medıatsııa rásimin bastaǵan. Alaıda taraptar daýdy retteı almaǵandyqtan, is sotqa jetti.
Eske sala ketsek, buǵan deıin brıtandyq pop-juldyz Dýa Lıpa sýretin ruqsatsyz paıdalanǵany úshin Samsung kompanııasyn sotqa berip, odan 15 mln dollar talap etkenin jazdyq.
