Samsung pen Tesla 16,5 mlrd dollarlyq chıpterdi jetkizý kelisimshartyna qol qoıdy

ASTANA. KAZINFORM — Samsung Electronics kompanııasy Tesla Inc-ke jartylaı ótkizgishterdi jetkizý boıynsha $16,5 mlrd dollarlyq kelisimshartqa qol qoıdy. Bul týraly Tesla basshysy Ilon Mask X-te habarlady. 

Kelisim 2033 jylǵa deıin jaramdy. Mıllıarderdiń aıtýynsha, Samsung kompanııasynyń Tehastaǵy jańa zaýyty AI6 chıpterin shyǵarýǵa arnalǵan. Ońtústikkoreıalyq kompanııa qazir AI4 chıpterip shyǵaryp jatyr.

— Bul óte mańyzdy sát, óıtkeni men progress qarqynyn jedeldetýge jeke qatysamyn. Onyń ústine zaýyt úıimniń janynda yńǵaıly ornalasqan, — dep jazdy Mask.

Samsung álemde Taiwan Semiconductor Manufacturing kompanııasynan keıingi ekinshi iri chıp jetkizýshi. Alaıda ońtústikkoreıalyq elektronıka alpaýytynyń operatsııalyq kirisi 2025 jyldyń ekinshi toqsanynda bir jylmen salystyrǵanda 56%-ǵa tómendedi. Kompanııa muny AQSh pen Qytaı arasyndaǵy saýda soǵysynyń saldarymen túsindirip otyr.

Dúısenbide amerıkalyq kompanııamen kelisim týraly habardan keıin Samsung aktsııalary 6,8%-ǵa ósti. Sarapshylardyń baǵalaýynsha, Tesla-men kelisimshart óndirýshiniń jyldyq kirisin 10%-ǵa arttyrýy múmkin.

Buǵan deıin Ońtústik Koreıanyń Joǵarǵy soty Samsung basshysyn tolyq aqtaǵanyn jazǵan bolatynbyz.