Samsung, Kia, jańa elektr stantsııasy: Koreıa Qazaqstanda qandaı jobalarǵa qatysyp jatyr
ASTANA. KAZINFORM – 2026 jyldyń birinshi jartyjyldyǵynda Koreıa Respýblıkasy Qazaqstannyń eń iri 10 saýda seriktesiniń qataryna endi. Eki el arasyndaǵy taýar aınalymy shamamen 1,3 mlrd dollarǵa jetken. Bul týraly Qazaqstannyń Ekonomıkalyq zertteýler ınstıtýty Prezıdent Qasym-Jomart Toqaevtyń Seýlge memlekettik sapary aıasynda habarlady.
Instıtýttyń habarlaýynsha, Qazaqstannan Koreıaǵa eksporttalatyn negizgi taýar – shıki munaı. Onyń kólemi – 479,4 mln dollar nemese barlyq jetkizilimderdiń 93,6% quraıdy. Sondaı-aq, Qazaqstan 28,6 mln dollarǵa (5,6%) ferroqorytpalardy, 3,4 mln dollarǵa – tıtan jáne odan jasalǵan buıymdardy eksporttaǵan (0,65%).
– Koreıa Respýblıkasynan ımportta avtomobıl jáne elektrotehnıka salalaryna arnalǵan ónimder úlesi joǵary. Qazaqstanǵa 155 mln dollarǵa avtomobılder men traktorlarǵa arnalǵan bólshekter men kerek-jaraqtar (19,7%), 100,1 mln dollarǵa – avtomobıl shanaqtary (12,8%), sondaı-aq 70,3 mln dollarǵa – pýltter, panelder jáne basqa da elektr jabdyqtary (9%) ımporttaldy, – dep jazdy Ekonomıkalyq zertteýler ınstıtýty.
Saýda yntymaqtastyǵynan bólek, ınvestıtsııalyq qyzmet te belsendi damyp keledi. Sońǵy on jylda Koreıa Respýblıkasynyń Qazaqstan ekonomıkasyna tikeleı ınvestıtsııalary kólemi shamamen 8 mlrd dollarǵa jetti.
Elde Ońtústik Koreıa kapıtalymen 700-den astam kompanııa jumys isteıdi, al taraptar jalpy quny shamamen 4 mlrd dollar bolatyn 46 jobany birlesip ázirlep jatyr. Basym baǵyttardyń qatarynda – mashına jasaý, hımııa ónerkásibi, qurylys materıaldaryn óndirý, ınfraqurylym jáne tehnologııalyq kooperatsııa bar.
– Áriptestiktiń eń mańyzdy nátıjeleriniń biri - 2025 jyly Qostanaı oblysynda Kia Qazaqstan avtomobıl zaýytynyń ashylýy boldy. Kásiporyn jylyna 70 myńǵa deıin avtokólik óndiredi, onda 1,5 myńǵa jýyq jumys orny ashyldy. Joba jergilikti óndiristiń damýyn jáne kásiporyn aınalasynda kóliktiń qosalqy bólshekterin jetkizýshilerdiń jeke bazasyn qalyptastyrýdy kózdep otyr, – delingen habarlamada.
Alıýmınıı dóńgelekteriniń óndirisi de – avtomobıl kooperatsııasynyń jańa baǵyty bolýy múmkin. 2026 jyldyń aqpan aıynda Astana Motors, ońtústik koreıalyq Hands Corporation jáne amerıkandyq Open Element Qazaqstanda birlesken kásiporyn qurý týraly úshjaqty memorandýmǵa qol qoıdy. Joba otandyq avtoónerkásipti damytýǵa jáne avtokólik bólshekterin tolyq óndiristik tsıklmen shyǵaratyn zamanaýı kásiporyn qurýǵa baǵyttalǵan.
Eki eldiń yntymaqtastyǵy avtoónerkásipten de basqa da salalarda kórinis tapqan. 2025 jyldyń tamyzynda Saran qalasyndaǵy Silk Road Electronics zaýyty Samsung teledıdary men kir jýǵysh mashınalaryn shyǵara bastady. Ónimder eń aldymen qazaqstandyq tutynýshylarǵa baǵyttalǵan.
– Taǵy bir úlken baǵyt – energetıka. Túrkistan oblysynda qýatty 1 000 MVt bý-gaz elektr stantsııasy salynyp jatyr, ony iske asyrýǵa Integra Construction KZ kompanııasymen birlesip bas merdiger retinde Ońtústik Koreıanyń Doosan Enterbility kompanııasy qatysady. Tolyq qýatqa shyqqan soń stantsııa 926,5 MVt qýat óndiredi jáne eldiń ońtústik óńirleriniń energııamen jabdyqtalýyn arttyrýy qajet, – deıdi ınstıtýt.
Almaty oblysyndaǵy Alatau City jobasy da ekijaqty yntymaqtastyqtyń jańa baǵytyna aınalýy múmkin. 2025 jyly jeltoqsanda QR Ónerkásip jáne qurylys mınıstrligi, «Alatau City Authority» memlekettik qory jáne Koreıanyń ınfraqurylym men qala qurylysy salasyndaǵy KIND korporatsııasy yntymaqtastyq týraly memorandým bekitti. Koreıa tarapy energetıka, sýmen jabdyqtaý jáne sý tazartý, sarqyn sýlar men qatty turmystyq qaldyqtardy qaıta óńdeý, sondaı-aq basqa da ınfraqurylymdyq jobalarǵa qatysýy múmkin.
Eske sala ketsek, Memleket basshysy Qasym-Jomart Toqaev Prezıdent Lı Chje Meńniń shaqyrýymen Koreıa Respýblıkasyna memlekettik saparmen bardy.
2030 jylǵa qaraı Seýl álemniń úzdik úsh qalasynyń biri bolmaq.
