«Samsýng» ınnovatsııalyq akademııasy stýdentterdiń básekege qabilettiligin arttyra túsedi - Ǵ. Mutanov
ALMATY. QazAqparat - «Samsýng» kompanııasynyń tájirıbeleri men tehnologııalaryn akademııalyq ortada paıdalaný - mamandarymyzdyń básekege qabilettiligin arttyra túsedi.
Bul týraly búgin Almatyda Samsýng Innovatsııalyq Akademııasyn qurý týraly memorandýmǵa qol qoıýǵa baılanysty ótken baspasóz máslıhatynda ál-Farabı atyndaǵy QazUÝ rektory, Ǵalym Mutanov málimdedi.
«Qazaqstandyq bıznestiń suranysyna beıimdetilgen ınnovatsııalyq ónimderdi ázirleý - qıyn mindet. Buǵan irgeli bilim men tájirıbelik daǵdylar kerek. Sol úshin Samsýng kompanııasynyń jobalardy ázirleý men olardy júzege asyrýdyń barlyq kezeńin qamtıtyn ǵylymı zerthanasyn qurý - stýdenttik startaptarǵa serpin beredi jáne jańa jumys oryndaryn ashady. Odan basqa, Samsýngtiń tájirıbesi men tehnologııalaryn akademııalyq ortada paıdalaný - mamandarymyzdyń básekege qabilettiligin arttyra túsedi» - dedi QazUÝ rektory.
Samsung Electronics Central Eurasia prezıdenti ıÝn Sý Kım óz kezeginde jumyspen qamtýda bul joba stýdentter úshin úlken múmkindikter beretindigin jetkizdi.
«Birinshiden, bul joǵary bilikti mamandar daıarlaýǵa yqpal etse, ekinshiden bizge jas mamandarmen olar kompanııaǵa jumysqa turǵanǵa deıin-aq birge jumys isteýge múmkindik beredi» - dedi ol.
Onyń aıtýynsha, Samsung-tiń eki zerthanasy kompanııanyń uıaly telefon, planshet, noýtbýk, fotokamera, sandyq teledıdar, prınter, salqyndatqyshtar sekildi ónimderin óndirý jáne jóndeýge arnalǵan zamanaýı qondyrǵylarmen jabdyqtalady.
Bul QazUÝ stýdentterine baǵdarlamalyq jasaqtamalar ázirleýge, aqparattyq-kommýnıkatsııalyq tehnologııalar jáne sandyq sheshimder salasynda birlesken qoldanbaly zertteýler júrgizýge jáne ál-Farabı atyndaǵy Qazaq ulttyq ýnıversıtetiniń áleýetin tarta otyryp, birlesken ınnovatsııalyq jobalardy júzege asyrýǵa septigin tıgizedi.
