Samsung basshysy jemqorlyq úshin tutqynǵa alyndy
ASTANA. QazAqparat - Seýl soty el prezıdenti Pak Kyn He aınalasyndaǵy iri jemqorlyq daýyna baılanysty paraqorlyq boıynsha aıyp taǵylyp otyrǵan Samsung korporatsııasynyń basshysy Lı Chje Endi tutqyndaýǵa order berdi, dep habarlaıdy QazAqparat «RIA Novostı» agenttigine silteme jasap.
Renhap agenttiginiń málimdeýinshe, is boıynsha sot sheshimi shyqqansha korporatsııa basshysy el astanasynan 15 shaqyrym jerdegi Iyvan qalasynyń túrmesinde bolady.
Іsti tergeý 28 aqpanǵa deıin aıaqtalýy tıis jáne Ońtústik Koreıa prezıdentiniń mindetin atqarýshy premer-mınıstr Hvan Ge Annyń kelisimimen bir aıǵa ǵana uzartyla alady.
Jemqorlyq daýy 2016 jyldyń qazan aıynda tutanǵan bolatyn. Basylym betterinde Samsung jáne ózge de ońtústikkoreılik iri korporatsııalardyń úkimetten jeńildik alǵany, qaıtarym retinde prezıdenttiń qurbysy Tsoı Sýn Sıl qurǵan qorlarǵa iri kólemde qarajat aýdarǵandary týraly aqparat jarııalandy. Habarlanǵandaı, eshqandaı memlekettik laýazymdy ıelenbegen áıel óziniń joǵary baılanystaryn paıdalana otyryp, prezıdent ákimshiligi isterine aralasqan jáne paıda tapqan.
