Samsung basshysy 12 jylǵa sottalýy múmkin
ASTANA. QazAqparat - Ońtústik Koreıanyń prokýratýrasy Samsung Group kompanııasynyń basshysy Lı Chje Endi 12 jylǵa sottaýdy talap etti, dep habarlaıdy QazAqparat «Reuters»-ke silteme jasap.
Tergeý organdarynyń paıymynsha, mıllıarder Chje En Ońtústik Koreıanyń burynǵy prezıdenti Pak Kyn Heniń qurbysy Tsoı Sýn Sılge qarjylyq qoldaý kórsetip kelgen.
Aqysyna Samsung basshysy óz bıznesin odan ári dóńgeletý úshin bılik tarapynan jeńildikter alyp otyrǵan. Málim etilgendeı, ol Tsoı Sýn Sılge jalpy alǵanda 38,3 mln dollar bergen. Sondaı-aq prokýratýra jemqorlyq shemasyna qatysqan Samsung-tiń taǵy úsh top-menedjerin 10 jylǵa sottaýdy talap etýde.
Bıznesmen bolsa taǵylǵan aıyptarmen tolyǵymen kelispeı otyr. Ol sońǵy sózinde kompanııa úshin nemese jeke óz basyna eks-prezıdentten qandaı da bir artyqshylyqtardy esh ýaqytta suramaǵanyn aıtty.
Sot sońǵy sheshimdi 27 tamyz kúni shyǵaratyny kútilýde. Chje En aǵymdaǵy jyldyń aqpan aıynan beri qamaýda otyr.
Lı Chje Enniń isi Ońtústik Koreıanyń eks-prezıdenti Pak Kyn Heniń aınalasynda týyndaǵan daý-damaıǵa baılanysty tergeýler serııasynyń bir bóligi. 2016 jyldyń kúzinde Pak Kyn Hege iri jemqorlyq isterine qatysy bar degen aıyp taǵylǵan bolatyn. Tergeý nusqasy boıynsha, oǵan jaqyn qurbysy Tsoı Sýn Sıl kómektesip kelgen. Bul, 2016 jyldyń sońynda Pak Kyn Hege ımpıchmenttiń jarııalanýyna alyp keldi. 2017 jyldyń naýryz aıynda Ońtústik Koreıanyń konstıtýtsııalyq soty ony bılikten alystatý týraly sheshim qabyldady. 9 mamyr kúni elde jańa prezıdent saılaýy ótti. Ońtústik Koreıanyń jańa basshysy Mýn Chje In boldy.
