Samsung Astanada oqýshy qyzdyń qaltasynda uıaly telefonnyń jarylýyna baılanysty jaǵdaıdy zerttep jatyr
ASTANA. QazAqparat - Samsung kompanııasy Astanada birinshi synyp oqýshysynyń qaltasynda uıaly telefonnyń jarylýyna baılanysty jaǵdaıǵa túsinikteme berdi.
«Samsung mamandary bolǵan oqıǵadan habardar. Biz osyndaı jaǵdaıdyń oryn alýyna sebep bolǵan ónimdi alǵannan keıin keshiktirmeı zertteýdi bastaımyz. Biz ózimizdiń tutynýshylarymyzdyń qaýipsizdigine beı-jaı qaramaımyz. Samsung Kazakhstan balanyń ata-anasymen olarǵa qajetti qoldaý kórsetý jáne osy jaǵdaıdy odan ári anyqtaý úshin baılanysty úzbeıdi», - delingen kompanııanyń habarlamasynda.
Eske sala keteıik, jeti jasar qyz qaltasyndaǵy "Samsung Galaxy S2" uıaly telefony jarylǵannan keıin úshinshi deńgeıde jaraqat alǵan. Ol aýrýhanaǵa jatqyzyldy, ata-anasynyń sózine qaraǵanda, onyń terisin jamaý úshin otaǵa daıyndap jatyr.
