Almatyda ótken jyly samokat pen mopedter 617 jol apatyna sebepker bolǵan
ALMATYDA. KAZINFORM — Almatyda byltyr mopedter men elektrosamokattardyń qatysýymen 617 kólik apaty tirkeldi.
Almaty qalalyq polıtsııa departamentiniń bastyǵy Arystanǵanı Zapparov málim etkenindeı, megapolıste 2,2 mln adamǵa 636 myńnan astam kólik tirkelgen. Sonymen qatar, keletin jáne ketetin kólikterdiń táýliktik aǵyny ortasha eseppen qaladan tys tirkelgen 500 myńǵa jýyq kólik bar.
Osylaısha, kúnine qala kóshelerinde bir mıllıonnan astam kólik júredi. Eger respýblıkada 5 mıllıonǵa jýyq kólik tirkelgen bolsa, olardyń árbir besinshisi nemese 20 paıyzy Almatyda júredi.
«Megapolıs turǵyndary men qonaqtarynyń jaıly ári qaýipsiz ómir súrýiniń mańyzdy faktory – jol qaýipsizdigi. 2023 jyldyń qorytyndysy boıynsha jol-kólik oqıǵalarynyń jalpy sanynyń, sonyń ishinde jaraqat alǵandar bolatyn JKO azaıǵany baıqalady. Kólik apatyna álemniń kóptegen shahary sııaqty balamaly kólik túrlerin – mopedter men elektrosamokattardy paıdalanýy áser etkenin bári biledi. Almaty joldarynda mundaı kóliktiń shamamen 50 myń júredi», - dedi Arystanǵanı Zapparov.
Aıtýynsha, ІІM qabyldaǵan sharalar samokattardy paıdalaný jaǵdaıyn birshama turaqtandyrýǵa múmkindik berdi: jas shekteýleri belgilendi, qorǵanys quraldaryn mindetti túrde paıdalanýǵa jáne jolaýshylardy tasymaldaýǵa talaptar qoıyldy.
«Taldaý kórsetkendeı, jol-kólik oqıǵalarynyń jalpy sanynyń 16,1%-y mopedter men samokattardyń júrgizýshileriniń arasynda bolady. Jol-kólik oqıǵalarynyń kópshiligi qıylystarda bolady, mopedıster «óli aımaqta» bolǵanda kólik júrgizýshileri olardy kórmeıdi. Sonymen qatar, kóptegen moped júrgizýshileri Jol qozǵalysy erejeleriniń negizderin bilmeıdi», - dedi qalalyq PD bastyǵy.
Jol-kólik jaraqattary men ólim-jitim sanyn azaıtý maqsatynda polıtsııa qyzmetkerleri kún saıyn jol apataryna taldaý júrgizip, sonyń negizinde patrýldeý arqyly qaýipti aımaqtardy kúsheıtip, tıisti uıymdarǵa jol jaǵdaıyn jaqsartý boıynsha uıǵarymdardy usynady.
