Samokattar baqylaýda: joldarda qaýipsizdikti qalaı qamtamasyz etýge bolady

ASTANA. KAZINFORM – Qazaqstanda elektrosamokattardyń qatysýymen jol-kólik apattarynyń kóbeıýine baılanysty Іshki ister mınıstrliginde kıksherıngilik kompanııalardyń ıelerimen keńes ótti, dep habarlaıdy Polisia.kz.

Bul jıyn Ákimshilik polıtsııa komıtetiniń tóraǵasy Qaırat Sultanbaevtyń buǵan deıingi brıfıngte aıtqan ýádesine sáıkes uıymdastyryldy. Basqosýda jol-kólik oqıǵalarynyń jıileýi, quqyqtyq retteýdiń jetkiliksizdigi jáne saladaǵy tártipti ornatý sharalary talqylandy.

Keńes qorytyndysy boıynsha kıksherıngilik kompanııalarǵa (Jet, ıAndeks, Woosh, Bolt jáne Birińǵaı mıkromobıldilik operatory) birqatar talap qoıyldy. Atap aıtqanda, polıtsııa qyzmetkerleriniń qatysýymen mobıldi patrýldik toptar quryp, elektrosamokatty paıdalanýshylar tarapynan bolatyn quqyq buzýshylyqtardyń aldyn alý, retsiz qaldyrylǵan samokattarǵa tosqaýyl qoıý mindetteldi.

Kompanııalarǵa sondaı-aq samokatty arnaıy turaq oryndaryna qoımaıynsha sapardy (tólemdi) aıaqtaýǵa múmkindik bermeý jáne jaıaý júrginshiler aımaqtarynda, saıabaqtarda, jaǵalaýda jáne buqaralyq is-sharalar ótetin jerlerde samokattardyń jumysyn avtomatty túrde buǵattaý tapsyryldy.

Bıyl elde elektrosamokattardyń qatysýymen 213 jol-kólik oqıǵasy tirkelip, 224 adam zardap shekken. Onyń ishinde samokatshylardyń kinásinen 42 apat oryn alyp, 52 adam jaraqat alǵan. Almatyda jaǵdaı kúrdeli – barlyq oqıǵanyń 95 paıyzy osy qalaǵa tıesili.

«Jol qozǵalysy týraly zańǵa engizilgen ózgeristerge eki jyl bolsa da, aıtarlyqtaı ilgerileýdi kórip otyrǵan joqpyz. Buzýshylyqtar kún saıyn tirkelýde, al kıksherıngilik kompanııalardyń qaýipsizdik baǵytyndaǵy jumysy áli de kútken nátıjege jetpeı otyr. Terrıtorııalyq polıtsııa departamentterine retsiz qoıylǵan samokattardy arnaıy turaqtarǵa jetkizýdi tapsyrdym», – dedi Qaırat Sultanbaev.

Jyl basynan beri elektrosamokat júrgizýshileri 20 myńnan astam jol erejesin buzǵan. Onyń ishinde:

• 6 jaǵdaı – mas kúıinde basqarý;
• 10 myńǵa jýyq aıyppul – jol qozǵalysy erejelerin buzǵany úshin;
• ondaǵan jaǵdaı – ata-analardyń balalarǵa samokatpen jolǵa shyǵýǵa ruqsat berýi.

Buzýshylyqtardyń basym bóligi Almatyǵa tıesili – 7 435 jaǵdaı (barlyq kórsetkishtiń 76 paıyzy).

Negizgi másele – kıksherıngilik servısterdiń ákimdikter jáne polıtsııamen úılesimdi jumysynyń joqtyǵy. Usynylǵan sharalar qatarynda qosymshalardy jetildirý, arnaıy turaqtardan tys sapardy aıaqtaýǵa tyıym salý, mobıldi patrýlder arqyly baqylaýdy kúsheıtý, samokatty durys qoımaǵan jaǵdaıda tárkileý jáne aıyppuldy operatorlar arqyly avtomatty túrde óndirý bar.

Qazirgi tańda elimizde nebári 594 shaqyrym velojol bar, al qajettilik 2 myń shaqyrymnan asady. Sońǵy bes jylda tek 218 shaqyrymy ǵana paıdalanýǵa berilgen.

«Elektrosamokattarǵa arnalǵan qaýipsiz ınfraqurylym bizde joqtyń qasy nemese endi ǵana qalyptasa bastady. Bul máseleni sheshý júıeli tásildi qajet etedi», – dedi Qaırat Sultanbaev.

Elektrosamokattardy jalǵa beretin kompanııalar birqatar sharany jaqyn arada júzege asyrýǵa, al kúrdeli máselelerdi memleket, bıznes jáne jergilikti bılik birlese otyryp sheshýge daıyn ekenderin jetkizdi. Basty maqsat – jol-kólik apattaryn azaıtyp, barlyq jol qozǵalysyna qatysýshylar úshin qolaıly ári qaýipsiz orta qalyptastyrý.

Aıta keteıik, Almatyda elektrovelosıped ıelerine eskertý jasaldy.