Samokatqa qatysty jańa shekteýler adamdardyń ómirine qater tóndirýi múmkin - sarapshy

ASTANA. KAZINFORM – Qazaqstanda elektrosamokat qozǵalysyn retteıtin jańa túzetýler qyzý talqylanyp jatyr.

Іshki ister mınıstrligi trotýarda júrýge qatań shekteý qoıýdy, júrgizýshi kýáligin mindetteýdi jáne birqatar basqa da talaptardy qoldap otyr. Sarapshylar mundaı bastamalar mıkromobıldik kólikke qatysty saıasatty túbegeıli ózgertip, qaýipsizdikke keri áser etýi múmkin ekenin eskertedi.

2023 jyly bul taqyryp ashyq qoǵam talqysynan ótip, barlyq normalar keńinen túsindirilgen edi. Al 2025 jyly túzetýler negizinen Parlament ishinde qaralyp, qoǵamdyq pikirtalastarsyz engizilip jatyr.

Mıkromobıldik kólik boıynsha sarapshy Ánýar Júsipovtiń aıtýynsha, basty másele – samokatta emes, qala ınfraqurylymynyń álsizdiginde.

Ol bastapqyda belgilengen jyldamdyq shekteýleriniń fızıkalyq turǵyda oryndalýy múmkin bolmaǵanyn atap ótedi.

«Júrginshi jolaǵyna absolıýtti basymdyq berý, jaıaý júrginshige zııan kelse qatań jaýapkershilik engizý, avtomobıl jyldamdyǵyn azaıtý sekildi sharalar arqyly ǵana qaýipsizdikke qol jetkizýge bolady. Al biz samokatty tyıym salý arqyly «joıýdy» kózdep otyrmyz. Bul – qate», – deıdi ol.

Sarapshynyń málimetinshe, ІІM deregine sáıkes, samokatpen bolǵan jol-kólik oqıǵalarynyń 80%-y kólik júrgizýshileriniń kinásinen bolady.

«Samokatshylardy kólik jolyna shyǵarý qaýipti birneshe esege arttyrady. Statıstıka boıynsha, sizdi kólik qaǵý yqtımaldyǵy óte joǵary bolady. Bul tyıymdar máseleni emes, adamdardy qaýipke ıtermeleıdi. Mıkromobıldik kólik – zamanaýı qalanyń ajyramas bóligi, Almatydaǵy jylyna samokatpen oryndalatyn bolatyn 20 mln júris – sonyń dáleli», – deıdi Júsipov.

Resmı derekke súıensek, 2025 jyldyń 9 aıynda kólik júrgizýshileriniń kinásinen 20 058 JKO tirkelgen. Elektrosamokat qatysqan JKO sany – 110.

Bul aıyrmashylyq mıkromobıldik kólikti shekteý negizgi máseleni sheshpeıtinin kórsetedi.

Halyqaralyq tájirıbe kórsetkendeı, elektrosamokatqa júrgizýshi kýáligin talap etý álemniń kóp elinde qarastyrylmaǵan.

Samokat — qoljetimdiligimen tanylǵan kólik túri, qosymsha kedergiler engizý álemdik trendke de, qala logıstıkasynyń zańdylyqtaryna da qaıshy keledi.

Birqatar depýtattar, sonyń ishinde Oljas Quspekov, veloınfraqurylym joq kezde samokatty kólik jolyna shyǵarý aýyr saldarǵa ákelýi múmkin ekenin eskertedi.

Olar samokatqa tyıym salýdy emes, ınfraqurylymdy jańartý; JSN arqyly tirkeý; jyldamdyqty tsıfrlyq shekteý syndy sharalardy birinshi kezekke qoıýdy usynady.

Sarapshylar mıkromobıldik kóliktiń ózi qaýip emes ekenin, kerisinshe zamanaýı qalalardaǵy tyǵyzdyqty azaıtýǵa kómektesetin tıimdi kólik ekenin atap ótedi.

Aıta keteıik, buǵan deıin Qazaqstanda samokat tizgindegenderge qosymsha shekteý ázirlenetini habarlanǵan bolatyn.