Samokat tizgindegenderdiń áreketi úshin kıksherıng kompanııalar jazalanýy múmkin

ASTANA. KAZINFORM — Іshki ister mınıstrligi samokat jalǵa beretin kompanııalardyń jaýapkershiligin qatańdatpaq.

Bul týraly Ákimshilik polıtsııa komıtetiniń tóraǵasy Qaısar Sultanbaev Ortalyq kommýnıkatsııalar qyzmetinde ótken baspasóz máslıhatynda aıtty. 

— Iá, shynymen de problemalar bar. Búgin saǵat 18.00-de kıksherıng kompanııalardyń basshylarymen kezdesý uıymdastyrylady. Búgingi tańda qandaı negizgi problemalar bar? Bul: trotýarda samokatpen júrý, jyldamdyq rejımin saqtamaý. Kıksherıng kompanııalardyń basshylary bir kezderi skýter trotýarlarda 6 shaqyrymnan aspaıtyn jyldamdyqpen júredi dep ant bergen. Alaıda, bul ýáde oryndalmaı otyr. Sondyqtan osy kompanııalardyń basshylaryna qatysty zań aıasynda sharalar qabyldanady. Sonymen qatar, jolaýshylar dittegen jerine jetken soń skýterdi beıbereket tastap ketedi. Bul jaıaý júrginshilerge kedergi keltiredi, — dedi Qaısar Sultanbaev.

Onyń aıtýynsha, ІІM jergilikti ákimdiktermen birge kıksherıng kompanııalardyń basshylaryna skýter turaqtaryn ornatý týraly usynyspen júgingen. Alaıda ol usynys aıaqsyz qalǵan.

— Osyǵan baılanysty polıtsııa barlyq kinálilerdi jaýapqa tartady, — dedi komıtet basshysy.

Buǵan deıin Almaty polıtsııasy elektrli samokat paıdalanýshylarǵa úndeý jasaǵanyn jazǵan edik.