Samokat tepken oqýshy: jelidegi taraǵan vıdeonyń Qazaqstanǵa qatysy joq
ASTANA. KAZINFORM — Áleýmettik jelilerde oqýshynyń aınalasyndaǵylardyń eskertýine qaramastan mektep ishinde samokatpen júrgen vıdeorolıgi tarady.
Jarııalanymdarda bul rolık Qazaqstanmen baılanystyrylyp, mektep oqýshylarynyń tárbıe deńgeıi tómendep, «adamgershilik qundylyqtar quldyrap bara jatqany» týraly pikirler aıtylǵan.
Budan bólek, bul qate nusqany jekelegen BAQ ókilderi de taratyp, rolıktiń naqty qaı jerde túsirilgenine qatysty óz aýdıtorııasyn jańylystyrǵan.
Jalǵan aqparatqa qarsy is-qımyl ortalyǵy bastapqy materıaldy taldady. Túrki tilderiniń uqsastyǵyna baılanysty rolıktegi sózderdi qazaq tilinde aıtylǵan dep qabyldaýǵa bolady. Ortalyqtyń tekserýi nátıjesinde vıdeonyń kórshi elde túsirilgeni anyqtaldy.
— Kadrda muny kórsetetin birqatar aýdıovızýaldy belgń baıqalady. Sonymen qatar, túpnusqa vıdeony jarııalaǵan akkaýnttyń Qazaqstanǵa qatysy joq ekeni anyqtaldy. Osylaısha, taralyp jatqan rolıktiń Qazaqstan mektepterine esh qatysy joq, — delingen habarlamada.
Bul jaǵdaı bastapqy derekkózdi qarapaıym tekserýdiń ózi qanshalyqty mańyzdy ekenin kórsetedi. Bógde elde túsirilgen vıdeoǵa Qazaqstanǵa qatysty sıpattama berilip, keıin ol qoǵamdaǵy jaǵdaı týraly emotsııalyq pikirler aıtýǵa sebep bolǵan.
Budan buryn Almatyda elektr samokattan qulaǵan er adam mert bolǵanyn jazǵanbyz.
