Samokat operatorlaryna jańa talaptar engiziledi

ASTANA. KAZINFORM – Elordada elektrosamokattardy paıdalaný salasyna qatysty jańa talaptar engizilmek. Bul týraly Astana qalasy Kommýnıkatsııalar qyzmetinde ótken brıfıngide qalalyq Polıtsııa departamenti Ákimshilik polıtsııa basqarmasy bastyǵynyń orynbasary Mahambet Tóleshov málim etti.

Onyń aıtýynsha, 2026 jylǵy 1 shildeden bastap kúshine enetin zańnamadaǵy ózgeristerge sáıkes, Ákimshilik quqyqbuzýshylyq týraly kodekske jańa norma engiziledi. Atap aıtqanda, kodekstiń 619-babynyń 2-tarmaǵyna sáıkes, basqarý quqyǵy joq azamattarǵa elektrosamokat usynǵan prokat operatorlary jaýapkershilikke tartylady.

– 2026 jylǵy 1 shildeden bastap ÁQBtK-niń 619-babynyń 2-tarmaǵy kúshine enedi. Bul normaǵa sáıkes, basqarý quqyǵy joq tulǵalarǵa elektrosamokat usynǵan operatorlarǵa jaýapkershilik júkteledi. Sonymen qatar prokat operatorlarynyń qyzmetine baqylaý kúsheıtilip, elektrosamokattarǵa mindetti tirkeý nómirlerin berý jáne olardy esepke alý talaptary engiziledi, – dedi spıker.

Sondaı-aq, ol operatorlardyń azamattyq-quqyqtyq jaýapkershiligin mindetti saqtandyrý qarastyrylǵanyn atap ótti.

– Elektrosamokat operatorlary tirkeý esebin júrgizýge, nómirlik belgilerdi berýge jáne olardy tıisti oryndarǵa ornalastyrýǵa mindetti bolady. Tirkeý nómirleri samokattyń artqy bóliginde jáne aldyńǵy tireginiń eki jaǵynda ornalasýy tıis, – dedi Mahambet Tóleshov.

Qazirgi ýaqytta «Sergek» júıesimen birlesip, tirkeý nómirlerin taný jáne quqyqbuzýshylardy avtomatty túrde jaýapkershilikke tartý jumystary júrgizilip jatyr.

– Tsıfrlyq tehnologııalar men sáıkestendirý júıelerin engizý quqyqbuzýshylardy tıimdi anyqtaýǵa, jol-kólik oqıǵalarynyń sanyn azaıtýǵa jáne paıdalanýshylardyń tártibin arttyrýǵa múmkindik beredi, – dep túıindedi spıker.

Buǵan deıin elde jalǵa beriletin samokattarǵa qandaı nómir beriletini anyqtalǵan edi.