Samokat miner aldynda neni bilý kerek: negizgi erejeler men jańa talaptar

Samokat – qarapaıym qural sııaqty kóringenimen, ol da jol qozǵalysynyń tolyqqandy qatysýshysy. Sondyqtan júrgizýshi eń aldymen qozǵalys ornyn durys tańdaýy kerek. Negizgi qaǵıda – múmkindiginshe velosıped jolymen nemese arnaıy jolaqpen júrý. Eger ondaı múmkindik bolmasa, joldyń oń jaq sheti nemese jol jıegi paıdalanylady. Al trotýarda júrýge ruqsat etiledi, biraq bul jaǵdaıda jaıaý júrginshilerge kedergi keltirmeý basty mindet. Munda jyldamdyq saǵatyna 6 shaqyrymnan aspaýy tıis.

Qandaı áreketterge tyıym salynady?

Zańda samokat júrgizýshilerine qatysty naqty shekteýler bar. Olar qaýipsizdikke tikeleı baılanysty:

* rýldi jiberip nemese bir qolmen basqarý

* jolaýshy tasý

* aýyr nemese basqarýǵa kedergi keltiretin júk alyp júrý

* jaıaý júrginshiler ótkelinen samokattan túspeı ótý

* qarańǵy ýaqytta jaryq shaǵylystyrǵyshsyz júrý

* shlemsiz jolǵa shyǵý

Bul talaptar kóp jaǵdaıda elenbeı jatady. Alaıda dál osy erejeler jol-kólik oqıǵalarynyń aldyn alýǵa kómektesedi.

Jolǵa shyǵý: kimge bolady, kimge bolmaıdy?

Samokatpen joldyń júrý bóligine shyǵý – jaýapty másele. Munda jas ereksheligine baılanysty talaptar bar.

18 jasqa tolmaǵandar:

* jeke kýáligi bolýy tıis

* biraq júrgizýshi kýáliginsiz joldyń negizgi bóligimen júre almaıdy

Sondyqtan jasóspirimder úshin eń qaýipsiz ári zańdy aımaq – trotýar men velojol.

Jaıaý júrginshilermen baılanys

Samokat júrgizýshisi úshin basty qaǵıdalardyń biri – jaıaý júrginshige basymdyq berý. Trotýarda qozǵalǵan kezde adamdarǵa jol berý, jyldamdyqty azaıtý, qaýip tóndirmeý mindet.

Bir sózben: jaıaý adam — árqashan birinshi orynda.

2026 jylǵy 1 shildeden bastap qandaı ózgerister bolady?

2026 jylǵy 1 shildeden bastap samokattardy jalǵa berý júıesine qatysty jańa talaptar engiziledi.

Endi prokat operatorlary úshin jaýapkershilik kúsheıedi. Atap aıtqanda, basqarý quqyǵy joq adamǵa samokat usynǵan kompanııalar jaýapqa tartylady.

Sonymen qatar:

* ár samokat mindetti túrde tirkeýge qoıylady

* nómirlik belgiler beriledi

* olar kóliktiń aldyńǵy jáne artqy bóliginde kórinip turýy tıis

Bul ózgerister ár samokatty jeke sáıkestendirýge múmkindik beredi.

Taǵy bir jańashyldyq – operatorlardyń azamattyq-quqyqtyq jaýapkershiligin saqtandyrý engiziledi. Bul jol-kólik oqıǵalary bolǵan jaǵdaıda jaýapkershilikti naqtylaýǵa baǵyttalǵan.

Baqylaý tetikteri de kúsheıedi. Qazirdiń ózinde «Sergek» júıesimen birlesip, samokattardyń nómirlerin avtomatty túrde taný jáne quqyqbuzýshylardy anyqtaý jumystary júrgizilip jatyr.

Qoryta aıtqanda, samokat – jaı ǵana yńǵaıly qural emes, naqty erejeleri bar kólik. Ony durys paıdalaný – tek zań talaby emes, óz qaýipsizdigiń men aınalańdaǵy adamdardyń amandyǵy úshin mańyzdy.

Aıta keteıik, jyl basynan beri Astanada elektr samokattarǵa qatysty 45 jol apaty tirkelgen.