Samoada qyzylshadan kóz jumǵandar sany artyp keledi
APIA. QazAqparat – Samoada qyzylsha epıdemııasynan qaza bolǵandar sany 70 adamǵa jetti, dep habarlaıdy QazAqparat RNZ.co.nz saıtyna silteme jasap.
Agenttiktiń málimeti boıynsha, sońǵy 24 saǵatta indetten 2 adam qaıtys bolǵan. Kóz jumǵan 70 adamnyń 61-i tórt jasqa deıingi balalar.
Jeksenbi kúni araldyq memlekettiń úkimeti Samoa turǵyndarynyń 90% ekpe alǵandyǵyn málimdedi. Úkimettiń málimdemesine qaramastan, sońǵy táýlikte qyzylshany juqtyrýdyń 112 oqıǵasy tirkeldi. Osylaısha, qazan aıynan bastap qyzylshamen aýyrǵandar sany 4700-ge jetti.
159 adam aýrýhanalarda jatyr, olardyń 16-sy aýyr háldegi balalar.
Agenttiktiń aqparatyna sáıkes, memleket basshylyǵy qaterli epıdemııamen qalaı da kúresý úshin beısenbi jáne juma kúnderi elden shyǵýǵa jáne kirýge tyıym saldy. Eki kún ishinde medıtsına qyzmetkerleri úılerge baryp ekpe jasady. Qyzylshaǵa qarsy vaktsınalardy Avstralııa, Jańa Zelandııa, Ulybrıtanııa, Frantsııa jáne taǵy da basqa elder usynǵan.
Aıta keteıik, ekpe aǵzaǵa engennen keıin qyzylshaǵa qarsy ımmýnıtet eki aptadan soń ǵana qalyptasady.
