Sammıtke baılanysty Astananyń medıtsınalyq mekemeleri oblystardan josparly túrde emdelýge kelgen naýqastardy ýaqytsha qabyldamaıdy

Astana qalasy Densaýlyq saqtaý basqarmasynyń bastyǵy Dáýlethan Esimovtyń aıtýynsha, bul shekteýler 20 qarashadan bastap engiziledi.

«Shuǵyl túrdegi jatqyzýlarda ózgerister bolmaıdy. Al óńirlerden josparly túrde jatqyzýǵa jiberilgenderdi qabyldaýǵa shekteý qoıamyz. Oblystardaǵy densaýlyq saqtaý mekemelerine bul kúnderge josparly jatqyzýǵa joldamalardy bermeý jaıly eskertildi. Josparly túrde tek elorda turǵyndary ǵana qabyldanady. Onyń ózinde ekinshi ret ota jasaý qajet bolǵan shuǵyl jaǵdaılarda ǵana. Bul QR Densaýlyq saqtaý mınıstriniń buıryǵy», dep atap ótti Esimov.

Basqarma bastyǵynyń sózine qaraǵanda, atalmysh sharalar ártúrli jaǵdaılar kezinde sammıt qonaqtaryn shuǵyl túrde jatqyzý úshin jasalyp jatyr. Máselen, qazirgi kúni qalalyq aýrýhanalarda barlyǵy 5500 tósek orny bolsa, onyń 1500-i sammıt kúnderi bos bolýy tıis. Sonymen qatar, qalalyq jáne respýblıkalyq aýrýhanalardan memleket basshylaryna arnalyp 51 VIP bólme jabdyqtaldy. Al jańadan salynǵan №2-qalalyq aýrýhanadan juqpaly aýrýlar jaǵdaıyna 60 jatyn bólme ázirlendi.