Sammıt kúnderi SES qyzmetkerleri tamaqtaǵy ýly ári zııandy qospalardy anyqtaıtyn test-júıelermen jabdyqtalatyn bolady

Bul týraly búgin ákimdikte jýrnalıstermen kezdesken Astana qalasy boıynsha Sanıtarlyq epıdemıologııalyq qadaǵalaý departamentiniń bastyǵy Jandarbek Bekshın málim etti.

Qalanyń bas sanıtarlyq dárigeriniń aıtýynsha, 25 qarashadan bastap Sammıtti ótkizýge qatystyrylatyn barlyq nysandarda, atap aıtqanda «qyzyl aımaqqa» engen ǵımarattarda, qonaqúıler men meıramhanalarda sanepıd qyzmetkerleri jumys isteıtin bolady. Olardyń barlyǵy test-júıelermen jabdyqtalǵan ekspress qurylǵylarmen qamtamasyz etiledi.

Onyń sózine qaraǵanda, zamanaýı test-júıelerdiń kómegimen taǵamnyń quramyndaǵy ýly jáne hımııalyq zattardy, aýyr metaldardy sanaýly sekýndtarda anyqtaýǵa bolady. Olardy satyp alýǵa qala ákimdiginen 2 mln. teńge bólingen.

Sondaı-aq Bekshınniń aıtýynsha, is-shara kúnderi jumys isteıtin 37 meıramhana men 68 qonaqúı búgingi kúnge deıin sanepıd erejelerine barynsha sáıkestendirildi. Tipti bul nysandarda kókónister aǵyndy sý astynda tek jýylyp qana qoımaı, dezınfektsııalanatyn bolady.

«Bul tájirıbe Qazaqstan aýmaǵynda buryn-sońdy paıdalanylmaǵan. Usynysymyzdy nysandardyń basshylary túsinistikpen qabyldady. Tipti sýyq taǵamdardy daıyndaý kezinde bir rettik qolǵaptardy kııý talabymyzdy oryndaýǵa ázir ekendikterin aıtty», - dedi Departament basshysy.

Sonymen birge qazir Astanaǵa azyq-túlik ónimderin jetkizetin - Soltústik Qazaqstan, Qostanaı, Pavlodar, Aqmola jáne Qaraǵandy oblystarynyń óndirýshi kompanııalarynda sanıtarlyq talaptardyń saqtalý jaǵdaılary tekserilýde.