Sammıt qonaqtaryna «Esik» sharap zaýyty óz ónimderin usynady
ALMATY. 23 qarasha. QazAqparat /Erbol Turymbetov/ - Astanada ótetin EQYU Sammıti kezinde «Esik» sharap zaýytynyń ónimderi usynylady.
Bul týraly «Esik» sharap zaýyty AQ-nyń jetekshi marketology Edgar Oganesıan zaýytta uıymdastyrylǵan baspasóz-týr barysynda málim etti.
«Bizdiń zaýyt Máskeýde ótip jatqan Indýstrııalyq kórmedegi qazaqstandyq jalǵyz kásiporyn bolyp otyr. Jaqynda Astanada bolatyn EQYU Sammıtine oraı QR Prezıdenti Ákimshiliginen bizdiń ónimderimizge tapsyrys tústi. Sonymen birge, aldaǵy Azıada oıyndarynyń qonaqtary úshin de tapsyrys alýdy josparlap otyrmyz», -dedi E. Oganesıan.
1932 jyly qurylǵan «Esik» sharap zaýytynda jalpy sany 150 adam qyzmet etedi. Zaýyt 2007 jyly ıtalıandyq Azienda Agricola «MARCATO» sharap kásipornynyń ókili Enrıko Markatomen birlese tolyqtaı jańa qurylǵylarmen jumys isteýge kóshti. Búginde júzimniń «Pıno-fran», «Saperavı», «Rıslıng», «Rkatsıtelı», «Mýskat» sorttaryn shyǵaratyn zaýyt elimizdegi eń sapaly sharap shyǵarýshylar qataryna kiredi.
