Sammıt qarsańynda elimizdiń basqa aımaqtarynan keletin kólikterdiń qozǵalysyna shekteý qoıylmaıdy
ANA. 1 qarasha. QazAqparat /Aıdar Ospanalıev/ - Eýropadaǵy qaýipsizdik jáne yntymaqtastyq uıymynyń Astanada ótetin sammıti kezinde joldaǵy tártipti qadaǵalaý úshin elimizdiń 6 aımaǵynan 300 shamasynda jol polıtsııasy ınspektorlary tartylady.
Olar Astana qalalyq Jol polıtsııasy basqarmasynyń qyzmetkerlerine elordadaǵy jol qaýipsizdigin qamtamasyz etý sharalaryna kómektesetin bolady. Bul týraly búgin jýrnalıstermen bolǵan brıfıngte Іshki ister mınıstriginiń Jol polıtsııasy komıteti tóraǵasynyń orynbasary Qabyljan Maıtybaev málim etti.
Onyń sózine qaraǵanda, Jol polıtsııasy komıteti qazirgi tańda resmı delegatsııanyń qandaı jolmen qalaı jyljıtyndyǵy jóninde arnaıy jospar jasaýda. «Sonymen qatar qalanyń sol jaǵalaýyndaǵy qozǵalystar da qalypqa keltirilýde. Osy ýaqytta syrttan keletin kólikterge arnalǵan qalany aınalyp ótetin joldar da belgilenip qoıdy. Bul týraly aqparattar 10 qarashaǵa taman taǵy bir pysyqtalyp, qoǵamnyń nazaryna usynylady. Sonymen qatar 29 qarashadan bastap elge respýblıkanyń basqa aımaqtarynan keletin kólikter tańǵy saǵat 10-00-den keshki 18-00-ge deıin kiretin bolady. Biraq bul másele boıynsha áli pysyqtaýdy qajet etetin jáıtter kóp. Jalpy alǵanda syrttan keletin kólikterge eshqandaı shekteý qoıylmaıdy», dedi komıtet tóraǵasynyń orynbasary.
