Samır Mamedov «Pavlodar barysy» atandy
PAVLODAR. QazAqparat - «Qazaqstan barysy - 2019» respýblıkalyq týrnırine Pavlodar oblysynan Samır Mamedov pen Muhtar Dálelhanuly qatysatyn bolady, dep habarlaıdy pavlodarnews.kz.
Oblystyq dene tárbıesi jáne sport basqarmasynyń buqaralyq dene tárbıesi jumysy bóliminiń bas mamany Elaman Mahambetovtyń aıtýynsha, «Baıantaý» sport kesheninde ótken oblystyq týrnırde óńirdiń ár aýdany men qalalarynan kelgen 28 palýan synǵa túsken. - Bıylǵy jarysta jastardyń kóptigi baıqaldy, - dedi Elaman Mahambetov. - Týrnırge qatysqan eń kishi palýandar aqtoǵaılyq Elaman Erǵantaı men aqsýlyq Ámrı Baqustar 1998 jyly týǵan bolsa, Aqqýly aýdanynan kelgen 1979 jylǵy Nazymbek Baıahmetov eń úlkeni. Jastarymyz ósip keledi. Júldegerler qataryna da kirip úlgerýde. Týrnır qorytyndysy boıynsha 3-oryn ekibastuzdyq Arman Mahambetovke buıyrsa, 2-oryndy 1997 jylǵy Baıanaýyl aýdanynyń palýany Muhtar Dálelhanuly enshiledi. Al, 1-oryndy Pavlodar qalasynan Samır Mamedov jeńip aldy. Muhtar Dálelhanuly ótken aptada Shymkent qalasynda ótken Qazaqstan Kýbogynda kúmis medal ıelenip, sport sheberi atanǵan bolatyn.
Eske sala keteıik, ótken jyly «Qazaqstan barysy» týrnırinde óńir namysyn Arman Mahambetov pen Samır Mamedov qorǵaǵan. Qazirgi ýaqytta palýandar Almaty qalasynda dopıng testisinen ótýde. Al, respýblıkalyq «Qazaqstan barysy - 2019» dodasy 8 maýsymda Nur-Sultan qalasynda ótedi.
