Samǵaý-2018: Jetisýdyń úzdik BAQ ókilderi marapattaldy
TALDYQORǴAN. QazAqparat - «Samǵaý» - jýrnalıster júldesiniń jeńimpazdary anyqtaldy. Jyldyń basty syılyǵy sanalatyn baıqaýda 11 nomınatsııa boıynsha 143 materıal baq synaǵan, dep habarlaıdy QazAqparat óńirlik kommýnıkatsııalar qyzmetine silteme jasap.
Saltanatty shara memleket basshysynyń «Bolashaqqa kózqaras: qoǵamdyq sanany jańǵyrtý» baǵdarlamalyq maqalasy aıasynda uıymdastyryldy. Úzdik dep tanylǵan BAQ ókilderin oblys ákimi Amandyq Batalov marapattap, qatysýshylardy aldaǵy Táýelsizdik kúnimen quttyqtap ótti.
«Jarqyn jetistikter men tolaıym tabystar elim degen árbir azamattyń kóńiline qýanysh syılaıdy. Al sol jetistikterge jetisýlyqtardyń da qosqan úlesi zor. Biz mádenıet pen ádebıet, áleýmet, ekonomıka syndy san sala boıynsha tolymdy kórsetkish kórsetip kelemiz. Taldyqorǵan shahary kórse kóz toımaıtyn sulýlyqqa ıe boldy. Qurylys salasy jandanyp, záýlim de ásem ǵımarattar sap túzedi. Bul - sizder men bizdiń ortaq jeńisimiz», - dedi óńir basshysy.
Sonymen qatar, oblys ákimi « Samǵaý» - jýrnalıstıka salasynyń ardagerlerin, oblys aýdandary men qala gazetteri, telearnalar, aqparattyq agenttikter men ınternet-basylym qyzmetkerlerinniń basyn qosatyn erekshe mereke ekenin atap aıtty.
Aıta keteıik, Almaty oblysynda BAQ ókilderine, olardyń shyǵarmashylyq jáne kásibı damýyna barlyq jaǵdaı jasalǵan. Mysaly, tek osy jyldyń ózinde 16 oblystyq BAQ ókilinen turatyn top elimizdiń 8 óńirinde bolyp qaıtqan. Oǵan qatysýshylar sakraldy geografııany zerdelep, Qazaqstannyń sakraldy geografııasy kartasyna engen 100-den astam nysandy óz kózderimen kórip qaıtty. Sondaı-aq, Reseı Federatsııasy, Ózbekstan, Belarýs jáne Ýkraına sııaqty kórshiles elderdiń baspa redaktsııasyna da is-saparlar uıymdastyrǵan. Erekshe atap óterlik taǵy bir jaıt, Al-Jazeera halyqaralyq medıa agenttigimen, Euronews, BBC telearnalarymen, NHK Japon habar taratý korporatsııasymen (ENEıChKEI) baılanys ornatylyp, yntymaqtastyq júrgizilip jatyr. Osyǵan sáıkes, endi Almaty oblysynyń jýrnalısteri osy medıa kompanııalardyń árqaısysynyń redaktsııasyna baryp, sheteldik áriptesterimen tájirıbe almasady.
Sonymen, úzdik dızaıner - Zarına Chechetova bolsa, «Úzdik beıne klıp» oblystyq «Jetisý» telearnasynyń rejısseri Danııar Mýstafaevqa tıesili. «Almaty oblysy týraly úzdik beıne-blog nemese úzdik bloger» - Qajet Andas. «Úzdik jelilik basylym» - Talǵat Abylaevtyń TINFO aqparattyq saıty.
«Aýdandyq, qalalyq basylymynyń úzdik tilshisi» - Álıma Núsipova, «úzdik fototilshi» - Jeńis Ysqabaı, «úzdik operator» - Oljas Baıbosynov, «úzdik jýrnalıst» - Aıgúl Okbaeva, «úzdik telejýrnalıst» - Gúlnar Jantasova. «Almaty oblysy týraly úzdik respýblıkalyq (halyqaralyq) aqparattyq materıaldy» jazǵan «Lıter» gazetiniń tilshisi Serik Maleev bolyp shyqty.
Aıta ketý kerek, QazAqparat agenttiginiń Almaty oblysyndaǵy menshikti tilshisi Samal Qabysheva baıqaýda eki nomınatsııa boıynsha júldeger atandy.
