Samboshylarymyz halyqaralyq týrnırdiń alǵashqy kúni 1 «altyn», 4 «qola» jeńip aldy
ASTANA. QazAQparat - Belarýs astanasy Mınsk qalasynda sambo kúresinen «A» sanatyndaǵy halyqaralyq týrnır ótip jatyr, dep habarlaıdy QazAqparat tilshisi.
Osymen 21-shi ret jalaýyn jelbiretip otyrǵan Belarýs Prezıdenti júldesine arnalǵan dástúrli týrnırge Qazaqstan quramasy da qatysyp jatyr. Jalpy, týrnırge jerlesterimizden bólek Reseı, Ýkraına, Belarýs, Rýmynııa, Grýzııa, Túrkimenstan quramalary qatysýda.
Keshe jarystyń alǵashqy kúni otandastarymyz 1 altyn jáne 4 qola medal jeńip aldy.
Erler arasynda 52 keli salmaqta Bolatbek Raıymqulov qarsylas shaq keltirmeı, chempıon atandy. Osy salmaqta Baǵlan Ibragım qola júldeni jeńip alsa, asa aýyr salmaq dárejesinde Erasyl Qajybaev jáne 62 kelide Baǵdat Jarylǵasov úshinshi orynǵa jaıǵasty. Al qyzdar arasynda Dınara Jumabaeva 64 keli salmaqta qola medal ıelendi.
