Samboshy Bolatbek Raıymqulov álem chempıonatynyń qola júldegeri atandy

ORAL. QazAqparat – Samboshy Bolatbek Raıymqulov erler men áıelder arasynda jáne jaýyngerlik sambodan Tashkentte ótip jatqan álem chempıonatynda qola júldeger atandy, dep habarlaıdy QazAqparat tilshisi.

BQO dene shynyqtyrý jáne sport basqarmasy joǵary jetistikter sporty bóliminiń basshysy Nurlan Qazımovtiń málim etkenindeı, jarystyń alǵashqy kúni Bolatbek 58 kelige deıin salmaqta kilemge shyqty.

Aldymen ol ázerbaıjandyq balýan Eıvaz Bahshıevti utty. Jartylaı fınalda tájikstandyq Akmalıdın Karımovqa 1:4 esebimen ese jiberdi.

Qola júlde úshin básekede B.Raıymqulov marokkolyq ıAser Boýhesonnan aılasyn asyrdy.

Bıyl 28 jasqa tolǵan halyqaralyq dárejedegi sport sheberi Bolatbek Raıymqulov osyǵan deıin sambodan eki márte Azııa chempıony atanyp, 2019 jyly Seýlde ótken álem birinshiliginde kúmis júldege ıe bolǵan edi.

Tashkentte Batys Qazaqstannan sondaı-aq Nurbol Serikov, Erkebulan Qalesh, Temirlan Kólbaı, Ádilbek Seısov el namysyn qorǵaıdy.

Halyqaralyq sambo federatsııasynyń saıtynan alynǵan málimetke qaraǵanda, bıyl dúnıejúzilik jarys alǵash ret jeti salmaq dárejesinde ótedi.

Álem chempıonatynyń júlde qory – 231 myń AQSh dollary. Chempıondarǵa 4 myń, kúmis júldegerlerge 3 myń, qola júldeger atanǵandarǵa 2 myń dollardan syıaqy beriledi.