Sambodan jastar men jasóspirimder arasynda Álem chempıonatynda 4 qazaqstandyq sportshy chempıon atandy
ALMATY. 17 qazan. QazAqparat /Erlik Erjanuly/ - Latvııanyń Rıga qalasynda 14-16 qazan kúnderi jastar men jasóspirimder arasynda Álem chempıonaty ótti.
Oǵan 24 elden 370 sportshy qatysty. Básekede jastar arasynda bozbalalar men boıjetkender - 10, al jasóspirimder arasynda erler - 10, qyzdar 9 salmaq dárejeleri boıynsha beldesken bolatyn. Jarystyń alǵashqy kúni Qazaqstan men Reseı tórt-tórten, al Armenııa, Bolgarııa, Grýzııa jáne Mońǵolııa balýandary bir-birden altyn medal oljalaǵan edi. Qazaqstandyqtardyń qorjynyna jarystyń ózge kúnderi birde-bir altyn medal túsken joq. Máselen juma kúni reseılikterden - 5, Belarýs, Grýzııa, Qyrǵyzstan, Tájikstan, Serbııa jáne Ýkraınadan bir-bir balýan Álem chempıony atandy. Al jarystyń sońǵy kúni eń bıik tuǵyrǵa reseılikter 4 ret, grýzınder, bolgarlar men ýkraındar eki-ekiden, belarýs pen mońǵoldar bir-bir retten kóterildi.
