Sambodan tórt márte álem chempıony Erbolat Baıbatyrov egiz qyzdyń ákesi atandy
ORAL. QazAqparat - 1 qańtar kúni tańerteńgi saǵat 09.00-de Oralda sambodan tórt márte álem chempıony Erbolat Baıbatyrov egiz qyzdyń ákesi atandy, dep habarlaıdy «QazAqparat» HAA tilshisi.
Erbolat pen jary Áıgerimniń osyǵan deıin Erdáýlet, Ermuhamet esimdi uldary bar-tuǵyn. Olardyń biriniń jasy 4-te, ekinshisi 3-te. Endi, mine, olardyń qataryna qos birdeı kóılektiger qosylyp, Erbolat pen Áıgerim kóp balaly ata-ana atanyp otyr.
«Jańa jyl osylaısha bizdiń otbasymyz, barsha aǵaıyn-týma úshin úlken qýanyshpen bastalyp otyr. Endi egiz qyzymyzǵa týma-týyspen aqyldasyp, jaqsy at qoımaqshymyz. Ózimniń josparymdy aıta ketsem, bıyl taǵy bir álem chempıonatynda baǵymdy synaǵym keledi. Ol úshin aldymen durystap daıyndalyp, irikteý jarystarynda júldeger atanyp, joldamany jeńip alý kerek. Bıylǵy dúnıejúzilik doda 10-12 qarashada Reseıdiń Sochı qalasynda ótedi», dedi «QazAqparat» tilshisine Erbolat Baıbatyrov.
Eske sala keteıik, budan buryn eresekter arasynda sporttyq sambodan tórt dúrkin álem chempıony atanǵan, Qazaqstannyń eńbek sińirgen jattyqtyrýshysy Raıymbek Meńdiǵalıev baptaıtyn polıtsııa aǵa leıtenanty, jasy otyzdan asyp bara jatqan E.Baıbatyrov úshin ótken jyl da jemissiz bolǵan joq. Bolgarııa astanasy Sofııa qalasynda ótken sambodan álem chempıonatynda Erbolat 57 kg salmaqta kúmis júldeger atandy. Endi sonyń altyn alqaǵa aınalýyn tileıik.
