Sambodan Qazaqstan chempıonatynyń jeńimpazdary anyqtaldy

BQO dene shynyqtyrý jáne sport basqarmasy málim etkenindeı, jarysqa 14 oblys pen 3 respýblıkalyq mańyzy bar qaladan jáne Baıqońyrdan 400-ge jýyq sportshy qatysyp, baq synady.

Bıylǵy birinshiliktiń ereksheligi, halyqaralyq sambo federatsııasy bekitken erejege sáıkes palýandar jańa salmaq dárejelerinde beldesti.

Úsh kúnge sozylǵan chempıonat qorytyndysynda BQO quramasy alty altyn medalǵa qol jetkizdi.

Atap aıtqanda, erlerden Bolatbek Raıymqulov (58 kg), Nurbol Serikov (71 kg), Erkebulan Qalesh (88 kg), Temirlan Kólbaı (98 kg joǵary), áıelderden Gúldana Álmuhanbetova (54 kg) jáne áskerı sambodan Ádilbek Seıisov (64 kg) chempıon atandy.

Sondaı-aq Erlan Ońalov (58 kg), Áıgerim Telemgenova (54 kg), Quralaı Qabyraıqyzy (50 kg) úshinshi orynǵa ıe boldy.

Áskerı sambodan Qazbek Supyǵalıev (64 kg) kúmispen kúptelse, Serik Qartabaev (71 kg), Rafael Tasbolatov (79 kg), Ádilet Kabýlov (98 kg) úzdik úshtikke ilikti.

Palýandar arasynan BQO TJ departamentiniń qyzmetkeri, 42 jastaǵy Serik Qartabaevty erekshe atap ótýge bolady. Ol ózinen áldeqaıda jas sportshylarmen kúresip, qola júldeni julyp aldy.

Bul – BQO dene shynyqtyrý jáne sport basqarmasy men oblystyq sambo federatsııasy, sondaı-aq Raıbek Meńdiǵalıev pen Nuftolla Túmenov bastaǵan bapkerlerdiń kóp jylǵy eńbeginiń jemisi.