Sambodan Azııa chempıonaty: Qazaqstandyq jasóspirim qyz jeńimpaz atandy
TARAZ. QazAqparat – Jambyldyq Elızat Aıazbek Nıý-Delı qalasynda ótken Azııa chempıonatynda sambo kúresinen 75 keli salmaq boıynsha jasóspirimder arasynda 1-oryn alyp, altynnan alqa taqty, dep habarlaıdy QazAqparat.
Elızat búginde Taraz memlekettik pedagogıkalyq Ýnıversıtetinde «NVP 19-3» tobynda bilim alady. Ol buǵan deıin Aqtaý qalasynda ótken el chempıonatynda óz salmaǵynda jeńimpaz atanyp, Azııa jáne Álem birinshiligine joldamany qanjyǵasyna baılaǵan bolatyn.
Ol Úndistan elinde ótken jasóspirimder arasyndaǵy qurlyqtyq birinshilikte Qyrǵyz jáne Ózbek balýandarymen beldesip, basym túsken.
«Ózge elde óz eliniń baıraǵyn bıiktetip, ánuranyn shyrqatý kez kelgen sportshynyń armany. Men sol armanyma jettim. Erekshe áserge bólendim. Jattyqtyrýshyma jáne senim artqan qazaq eline, jambyldyqtarǵa zor alǵysymdy jetizgim keledi. Buıyrtsa osy jetistigimdi Tashkent qalasynda ótetin Álem chempıonatynda qaıtalasam deımin. Ol úshin aıanbaı daıyndalýǵa, ter tógýge daıynmyn», - deıdi balýan qyz.
Aıta keteıik, Úndistan elinde ótken Azııa chempıonatyna 14 eldiń spotrshylary qatysty. Olar jastar, jasóspirimder jáne eresekter bolyp, Sambo kúresinen synǵa tústi. Nátıjesinde jalpy komandalyq esepte Ózbekstan quramasy birinshi, Qazaqstan ekinshi, Qyrǵyz Respýblıkasy úshinshi orynǵa turaqtady.
