Sambodan álem kýbogy kezeńinde qos birdeı batysqazaqstandyq palýan chempıon atandy
ORAL. QazAqparat - Astana qalasynda «EKSPO-2017» halyqaralyq kórmesi aıasynda sambodan QR Prezıdentiniń júldesi úshin álem kýbogy kezeńinde batysqazaqstandyq palýandar tabysty óner kórsetti, dep habarlaıdy «QazAqparat» tilshisi.
Áskerı sambodan Qazbek Supyǵalıev 62 kg jáne Temirlan Ihsanǵalıev 82 kg salmaqta eshkimge des bermeı, altynnan alqa taqty. Sol sekildi sambodan 57 kg salmaqta Syrym Meıirmanov fınalǵa deıin jaqsy kúresip, sońǵy básekede álem chempıony Beıimbet Qanjanovqa ǵana ese jiberdi. 68 kg salmaqta Nurbol Serikov kúmis júldege qol jetkizse, Baǵdat Jarylǵasov úshinshi orynǵa kóterildi. Oǵan qosa Bolatbek Raıymqulov (52 kg) pen Temirlan Kólbaı (100 kg) qola júldege ıe boldy.
Aıta keteıik, halyqaralyq sambo federatsııasynyń saıtynan alynǵan málimetke qaraǵanda, eki kúnniń qorytyndysy boıynsha Qazaqstannan áıelder arasynda Nazgúl Elmuratova (52 kg), Aqqal Ótebek (60 kg), Dınara Jumabaeva (64 kg), erlerden B.Qanjanovqa qosa Ǵalym Ábdirahmanov (74 kg), áskerı sambodan Naýryzbek Dáýletbaev (57 kg), Asylbek Smaılov (74 kg), Raıhan Mádı (100 kg) chempıon atandy.
